Жонни Андерсон исмли британиялик эркак ўзи билан йўлда содир бўлган ноодатий воқеа билан бўлишди. Маҳаллий қурилишлардан бирига цемент қоришмасини ташийдиган автоцистернани бошқариб кетаётган эркак орқани кўришга мўлжалланган ойнага қараб, 20 га яқин машина ўзини таъқиб қилаётганини пайқаб қолган. Ҳайдовчилар цистернада ёнилғи бор деб ўйлаб, Жоннининг машинаси ортидан юрган, деб хабар беради Motor.
Жонни Андерсон Вулверхэмптондан Нортгемптонширга 44 тонна цемент қоришмасини ташиётган бўлган. Шоссе бўйлаб ҳаракатланаётган эркак юк машинаси ортида тартиб билан колонна ҳосил қилган 20 га яқин автомобилни кўриб қолган. Шу билан бирга, уларнинг ҳеч бири цистернани қувиб ўтишга уринмаган.
Йўл охирида Жонни қурилиш майдончасига элтувчи тупроқ йўлга бурилган. Ёпиқ ҳудудга кириш вақтида таъқиб қилиб келган машиналар фаол сигнал чалишни бошлади. Андерсон улар шу орқали юк машинасидаги бирор муаммони айтмоқчи деб ўйлаган. Британиялик «цементовоз»ни тўхтатган ва ҳаракатнинг бошқа иштирокчилари қаршисига чиққан.
Биринчи енгил машинанинг ҳайдовчиси ундан ёнилғини қайси шохобчага олиб кетаётганини сўраганида Жонни аслида нима бўлганини тушунган. Андерсон ҳайдовчиларга қурилиш цементини олиб кетаётганини айтиб, уларни ортга қайтариб юборган.
Буюк Британияда ёнилғи захиралари сентябрь охиридан бошлаб тугаган ва бу шохобчаларда улкан навбатларни юзага келтирган. Бунга сабаб — бензовоз ҳайдовчиларининг етишмаслиги, пандемия ва Brexit’дан кейин визаларни расмийлаштириш қийинлиги учун уларнинг аксарияти мамлакатни тарк этган. Экспертларнинг баҳолашича, бугунги кунда Буюк Британияда 100 мингга яқин оғир юк машиналари ҳайдовчилари етишмайди.
Аввалроқ Роналдунинг Bentley’си заправкада етти соат кутганига қарамай, бензинсиз қолгани тўғрисида хабар берилганди.
Изоҳ (0)