29-sentabr kuni Cheshir grafligidagi Shell yonilg‘i quyish shoxobchasida dunyoga mashhur futbolchi Krishtianu Ronaldu tomonidan yaqindagina xarid qilingan qora Bentley Flying Spur ko‘rinish berdi. Ma’lum qilinishicha, Bentley shoxobchaga soat 14:00 larda kirgan va uning hududini kechki soat 21:00 larda tark etgan. Shuncha vaqt kutganiga qaramay, Buyuk Britaniyada kuzatilayotgan yonilg‘i tanqisligi sabab mashina yonilg‘isiz qolgan, deb xabar beradi Motor.

Foto: The Sun

Uilmslou shaharchasida yonilg‘i quyish shoxobchasiga Bentley bilan birga futbolchining odatda tan soqchilari harakatlanadigan kumushrang Range Rover ham kirib kelgan. Shoxobchada “Manchester Yunayted” o‘yinchisining o‘zini ko‘rishmagan, ammo Ronaldu oilasi bilan stansiya yaqinidagi hashamatli uyda yashayotgani ma’lum.

Keyinroq Range Rover shoxobchadan ketgan, Flying Spur esa yomg‘ir ostida yetti soat benzovoz kelishini kutgan, ammo u kelmagan. Ta’kidlanishicha, benzovoz kelgan taqdirda ham Ronalduning haydovchisi maksimum 30 funt sterlingli yonilg‘i quya olgan bo‘lardi: Shell inglizlar ortiqcha yonilg‘i olmasligi uchun vaqtincha cheklovlarni joriy etgan.

“Pullariga qaramay, Ronaldu biz bilan bir qayiqda qoldi”, — deb yozadi surat muallifi.

Foto: The Sun

Qiymati 2,2 million dollar turuvchi Bentley Flying Spur modeli yaqinda futbolchining avtoparkidan o‘rin oldi. Uning kolleksiyasida hozirda Ferrari, Lamborghini, McLaren, ikkita Rolls-Royce, Porsche 911 Turbo S, Koenigsegg CCX, Bentley Continental, Range Rover hamda bir nechta Mercedes-Benz va Audi modellari mavjud. Shuningdek, uning uchta Bugatti giperkari bor: Veyron Grand Sport, Chiron va 10 nusxada ishlab chiqarilgan Centodieci’lardan biri.