«Гарри Поттер» ёзилган кафеда ёнғин чиқди. Жоан Роулингнинг севимли столи сақлаб қолинди

Гарри Поттер романи ёзилган The Elephant House кафесида бундан бир ой аввал катта ёнғин содир бўлди. Оқибатда бутун бинога жиддий зарар етган.

Жоан Роулинг ушбу романни Эдинбургдаги The Elephant House кафесида ёзган. У ернинг бошлиғи Дэвид Тэйлор сага муаллифи 90 йилларда кафега тез-тез ташриф буюргани, ўзининг севимли жойига ўтириб, афсунгар болакай ҳақидаги романини ёзиш билан машғул бўлганини таъкидлаган.

Ўз вақтида ишга киришган ўт ўчирувчилар ёнғинни зудлик билан бартараф қилган. Кафе эгасининг маълум қилишича, Роулингнинг ёғочдан ясалган севимли столи сақлаб қолинган. Қолдиқлар орасидан столнинг топилиши уни ғоят шод қилган.

Шунингдек, кафе эгаси уюмлар орасидан Роулингнинг дастхати туширилган «Гарри Поттер»нинг китобларидан бирини топиш илинжида. Маълум қилинишича, жиддий зарар етгани туфайли The Elephant House бир йилга яқин вақт ичида очилмайди. Ёзувчининг столи сотувга қўйилиши ёки музейга юборилиши ҳали аниқ эмас.

Шунга қарамай, кафе роман ёзилишидаги ягона муҳим жой эмаслигини ҳам таъкидлаш жоиз. Кичик афсунгар ҳақида ёзиш ғояси Роулингнинг хаёлига тўсатдан келган. Бу вақтда у Манчестердан Лондонга келадиган поездни кутаётган бўлган. Етиб келганидан кейин эса дарҳол сюжет устида ишлашни бошлаб юборган.

Гарри Поттер ҳақида дунё илк бор бундан деярли 25 йил аввал эшитган. Аммо ўша вақтнинг ўзидаёқ яхшилик ва ёвузлик, дўстлик ва ҳамфикрлик ҳақидаги ҳикоянинг муваффақият келтириши аниқ бўлган. Роман асосида суратга олинган фильм эса китобдан кам бўлмаган машҳурликка эришган. 2021 йилнинг февралида HBO Max стриминг платформаси Гарри Поттер ҳақида сериал суратга олиш режалаштирилаётгани ҳақида маълумот берган. Лойиҳалаштириш ишлари ҳали давом этаётгани сабаб актёрлар таркиби ва қачон эфир юзини кўриши ҳақида ҳали маълумот йўқ.