Jonni Anderson ismli britaniyalik erkak o‘zi bilan yo‘lda sodir bo‘lgan noodatiy voqea bilan bo‘lishdi. Mahalliy qurilishlardan biriga sement qorishmasini tashiydigan avtosisternani boshqarib ketayotgan erkak orqani ko‘rishga mo‘ljallangan oynaga qarab, 20 ga yaqin mashina o‘zini ta’qib qilayotganini payqab qolgan. Haydovchilar sisternada yonilg‘i bor deb o‘ylab, Jonnining mashinasi ortidan yurgan, deb xabar beradi Motor.
Jonni Anderson Vulverxemptondan Nortgemptonshirga 44 tonna sement qorishmasini tashiyotgan bo‘lgan. Shosse bo‘ylab harakatlanayotgan erkak yuk mashinasi ortida tartib bilan kolonna hosil qilgan 20 ga yaqin avtomobilni ko‘rib qolgan. Shu bilan birga, ularning hech biri sisternani quvib o‘tishga urinmagan.
Yo‘l oxirida Jonni qurilish maydonchasiga eltuvchi tuproq yo‘lga burilgan. Yopiq hududga kirish vaqtida ta’qib qilib kelgan mashinalar faol signal chalishni boshladi. Anderson ular shu orqali yuk mashinasidagi biror muammoni aytmoqchi deb o‘ylagan. Britaniyalik “sementovoz”ni to‘xtatgan va harakatning boshqa ishtirokchilari qarshisiga chiqqan.
Birinchi yengil mashinaning haydovchisi undan yonilg‘ini qaysi shoxobchaga olib ketayotganini so‘raganida Jonni aslida nima bo‘lganini tushungan. Anderson haydovchilarga qurilish sementini olib ketayotganini aytib, ularni ortga qaytarib yuborgan.
Buyuk Britaniyada yonilg‘i zaxiralari sentabr oxiridan boshlab tugagan va bu shoxobchalarda ulkan navbatlarni yuzaga keltirgan. Bunga sabab — benzovoz haydovchilarining yetishmasligi, pandemiya va Brexit’dan keyin vizalarni rasmiylashtirish qiyinligi uchun ularning aksariyati mamlakatni tark etgan. Ekspertlarning baholashicha, bugungi kunda Buyuk Britaniyada 100 mingga yaqin og‘ir yuk mashinalari haydovchilari yetishmaydi.
Avvalroq Ronalduning Bentley’si zapravkada yetti soat kutganiga qaramay, benzinsiz qolgani to‘g‘risida xabar berilgandi.
Izoh (0)