Бир жуфт тўнғиз Барселонадаги боғда Милан исмли саккиз ёшли ўғли билан сайр қилиб юрган таниқли қўшиқчи Шакиранинг сумкасини олиб қочди. Бу ҳақда қўшиқчи ўзининг Instagram’даги саҳифаси орқали маълум қилган, деб ёзади Esquire.
Шакира ижтимоий тармоқ орқали ҳайвон томонидан йиртиб ташланган рюкзакни намойиш этган. «Боғда менга ҳужум қилган икки тўнғиз сумкамни қай аҳволга солганини кўринглар. Улар сумкани телефоним билан бирга ўрмонга олиб кетди. Улар барчасини дабдала қилди», — дейди Шакира.
Шундан сўнг қўшиқчи ўғлига мурожаат қилган: «Милан, тўғрисини айт. Онанг тўнғизга қандай қаршилик кўрсатганини гапириб бер».
Шакира Барселонада сўнгги йилларда пайдо бўлган ёввойи тўнғизларнинг кўплаб жабрланувчиларидан бирига айланди. 2016 йилда испан полицияси тўнғизларнинг итлар, мушук ва автомобилларга ҳужуми билан боғлиқ 1187 та чақирувни рўйхатга олган.
Ҳозирда Европадаги тўнғизлар сони 10 миллиондан ошади. Йирик шаҳарларда яшайдиган ушбу ҳайвонлар инсонлар томонидан ташланган чиқиндилар билан озиқланади.
Изоҳ (0)