Видео: бензин учун навбатда турган британияликлар троллинг қилган чавандоз

Гас Ли-Долфин исмли лондонлик ижтимоий тармоққа ёнилғи қуйиш шохобчаси олдида турган узун навбат ёнидан шошганча отда ўтиб кетаётгани тасвирланган видеони жойлаштирди. Бу вақтда у танлаган транспортининг универсаллигини кўрсатувчи The Beach Boys гуруҳининг Sloop John B қўшиғини куйлаган. Буюк Британияда кузатилаётган ёнилғи танқислиги фонида шохобчада қолиб кетган ҳайдовчиларни тролл қилаётган видео интернетда кенг тарқалиб, миллионлаб марта томоша қилинди, деб хабар беради Motor.

Evening Standart газетасининг ёзишича, лондонлик эркак Британия пойтахтининг ғарбида жойлашган Остерли даҳасидаги Shell ёнилғи қуюш шохобчасига от минган ҳолда келган. Унинг телефони объектидан ўрин олган навбатнинг охири кўринмайди.

«Бензин учун навбат, мен эса отдаман. Унга бензин керакмас, у сабзида ‘юради’», — дейди чавандоз.

Турли ижтимоий тармоқларда тарқалган видеога билдирилган муносабатлар асосан ижобий: улар эркакнинг ҳаракатини ўта «британча» деб атаган ва Ли-Долфиннинг транспорти неча от кучига эга эканлиги билан қизиққан. Айримлар эса чавандозга сабзи танқислигига учрашини тилаган.

Буюк Британияда ёнилғи захиралари сентябрь охиридан бошлаб тугаган ва бу шохобчаларда улкан навбатларни юзага келтирган. Бунга сабаб — бензовоз ҳайдовчиларининг етишмаслиги, пандемия ва Brexit’дан кейин визаларни расмийлаштириш қийинлиги учун уларнинг аксарияти мамлакатни тарк этган. Экспертларнинг баҳолашича, бугунги кунда Буюк Британияда 100 мингга яқин оғир юк машиналари ҳайдовчилари етишмайди.