UzAuto Motors ижтимоий тармоқларда компаниянинг автомобиллари учун тузилган шартномаларда машиналар нархи ўзгарса, қўшимча маблағ тўлаш лозимлиги тўғрисида тарқалган хабарларга расмий муносабат билдирди.
Ижтимоий тармоқларда янгиланган Captiva модели учун шартнома тузиш бошлангандан сўнг, шартномадаги автомобиль нархи ўзгариши мумкинлиги тўғрисида келтирилган банд муҳокамаларга сабаб бўлди. Telegram’даги «Kurbanoff.net» канали муаллифининг ёзишича, компания 2019 йилдаги ваъдасини унутган ҳолда, яна шартномага етказиб берилган автомобиль учун нархнинг ошиши мумкинлиги тўғрисидаги бандни қайта киритган.
Эслатиб ўтамиз, 2019 йил ноябрь ойи охирида Монополияга қарши курашиш қўмитаси UzAuto Motors шартномаларидаги автомобиллар нархи ўзгарган тақдирда, қўшимча ҳақ тўлаш тўғрисидаги банд чиқариб ташланиши ҳақида хабар берган эди. Ижтимоий тармоқларда тарқалган хабарлардан сўнг, қўмита UzAuto Motors шартномаларидаги қўшимча тўловлар тўғрисидаги бандни ўрганишини маълум қилди.
UzAuto Motors томонидан билдирилган муносабатда таъкидланишича, шартномада бир томонлама нархларни ошириш ҳақида ҳеч қандай банд йўқ.
Қайд этилишича, шартноманинг 2.4 банди ҳозиргидек каби илгари ҳам бўлган. Ушбу бандда келтириладики, қўшимча тўлов фақатгина автомобиль комплектацияси ўзгаргандагина амалга оширилади.
«Бундан кўриниб турибдики, хабар муаллифлари ушбу банд, шунингдек, шартноманинг навбатдаги бандлари билан тўлиқ танишишмаган. 2.4.1 ва 2.4.3 бандларига кўра, агар комплектация эълон қилингандан фарқ қилса, харидор тўловни қайтариш шарти билан автомобиль харидидан воз кечиши ёки уни алмаштириш ҳуқуқига эга», — дейилади муносабатда.
Маълум қилинишича, 2.4-банд автомобиль комплектацияси ўзгариши мумкин бўлган вазиятларда мижоз учун бир нечта таклифларни тақдим этади. Ушбу шартномада харидор ҳуқуқлари ҳимояланган ва агар мижоз қўшимча тўлов қилишни хоҳламаса, унда ҳар доим танлов ҳуқуқи бор: у харид қилишдан воз кечиб, пулни қайтариб олиш ёки автомобилни мос келадиган модификацияга алмаштиришни талаб қилиш ҳуқуқига эга.
Шунингдек, UzAuto Motors шартномага мувофиқ келтирилган компонентларга кўра автомобиль нархи ошмаслигини эслатиб ўтган.
Аввалроқ МИБ UzAuto Motors’дан давлат фойдасига 257 миллион сўм бож ундиргани ҳақида хабар берилган эди.
Изоҳ (0)