Самарқанд автомобиль заводи (SamAuto) эски моделдаги қатор юк машиналари ва автобусларни ишлаб чиқаришни тўхтатади. Бу ҳақда компания матбуот хизматига таяниб, Spot хабар берди.
SamAuto ҳамкорликда ишлаб келаётган Isuzu компанияси 729-авлодидан воз кечиб, янги 700P авлодидаги моделларни ишлаб чиқаришга ўтмоқда. Янги моделларда қатор қулайлик ва янгиланишлар мавжуд — масалан, марказий қулф, кондиционер, шунингдек, такомиллаштирилган тормозлар.
Самарқанддаги заводда ҳозирда 700P линейкасидаги моделларнинг бир қисми ишлаб чиқарилмоқда. Мазкур қарор 729-авлодга кирувчи моделларга тааллуқли — Isuzu NPR 66PV, Isuzu NQR 71PL, Isuzu FVR 33P ва Isuzu FVR 33G.
Айни вақтда Ўзбекистонда иккала авлодга кирувчи машиналарни ҳам харид қилиш мумкин. SamAuto 729 авлодидаги машиналарнинг эгаларини қўллаб-қувватлаш мақсадида Япониядан 1000 дона жамланма эҳтиёт қисмлар буюртма қилган. Компания янги конфигурацияга «силлиқ ўтишни» таъминлайди.
«729-авлодга кирувчи автомобиль эгалари учун эҳтиёт қисмлар кейинги 10 йил давомида ишлаб чиқарилади», — дейди SamAuto бош директорининг маркетинг ва савдо бўйича ўринбосари Илҳом Ярашев.
Аввалроқ Қозоғистонда SamAuto SAZ LE60 автобусларини ишлаб чиқариш йўлга қўйилиши тўғрисида хабар берилганди.
Изоҳ (0)