Австралиянинг ANCAP мустақил ассоциацияси Toyota Yaris Cross ихчам кроссовери ва Isuzu MU-X йўлтанламаси иштирокида краш-тестлар сериясини ўтказди. Синов натижаларига кўра, базавий жамланмадаги иккала модель ҳам ҳайратланарли натижаларни кўрсатган, деб хабар беради Motor.
ANCAP краш-тестлари дастури олти босқичдан иборат. Янги автомобиллар 50 фоизли қоплама билан соатига 50 километр тезликда олд томони билан 1,4 минг килограммли ҳаракатланаётган тиркамага, шунингдек, худди шу тезликда силжимас тўсиққа урилган. Транспорт воситалари соатига 60 километр тезликда ён томони билан тиркамага, шунингдек, устун билан ҳам тўқнашув содир этган. Бундан ташқари, мутахассислар ўриндиқларнинг стенд синовини ва соатига 40 километр тезликда пиёдаларни уриб юбориш имитациясини ўтказган.
Базавий жамланмадаги Toyota Yaris Cross ва Isuzu MU-X фронтал ва ён хавфсизлик ёстиқчалари, шу билан бирга, ҳайдовчи ва йўловчи ўртасидаги ёстиқчалар ҳамда автоматик равишда фавқулодда тормозланиш тизими билан жиҳозланган. Шунингдек, Isuzu қўшимча равишда ҳайдовчи тиззаларини ҳимоя қиладиган воситаларга эга.
Синовлар давомида иккала модель ҳам яхши кузов қаттиқлигини ва катта ёшдаги ҳамда ёш йўловчилар учун юқори хавфсизлик даражасини намойиш этган. Yaris Cross’нинг ичидаги манекенлар интерьер юзасига урилганига қарамай, мутахассисларнинг ҳисоблашича, юкланиш бир марта ҳам фавқулодда ёки хавфли чегарага етмаган. Экспертлар Toyota’даги барча йўловчиларнинг хавфсизлигини 86 фоизга баҳолаган. Isuzu’нинг катталар ва болалар учун ҳимояланганлик даражаси мос равишда 87 ва 85 фоизни ташкил этган.
Мутахассислар, шунингдек, моделларнинг пиёдалар ва велосипедчилар билан тўқнашувидаги хавфсизлигини ҳам текширган. Yaris Cross’нинг фавқулодда тормозланишдаги автоматик тизими юқори самарадорликни кўрсатган. Isuzu MU-X’нинг шу каби технологияси эса вазифани ёмонроқ уддалаган. Тизим ҳаракатланаётган велосипедчини доим ҳам танишга қодир эмас, айниқса, сутканинг қоронғи вақтида.
Аввалроқ Tesla Model 3 велосипедчи билан тўқнашувнинг олдини олиш тестидан ўта олмагани тўғрисида хабар берилганди.
Изоҳ (0)