Toyota компанияси ўзининг янги Tundra пикапини қаттиқ синовдан ўтказди — машина кузовига тўрт метр баландликда 227 килограммли юк ташланган. Бу каби тест кузовнинг янги SМC композитдан қопламасини реклама қилиши керак, деб хабар беради Motor.
Toyota реклама мақсадида янги Tundra кузовига қутидаги двигателни ташлади ва композит платформа зарбга бардош берди. Бир қарашда стресс-тест машина ромининг деформациясига ёки «подвеска»сига зарар етказмагандек, бироқ пикапнинг синовдан кейинги суратлари эълон қилинмаган.
Япон автомобиль ишлаб чиқарувчиси учун композит кузовнинг мустаҳкамлигини тасдиқлаш муҳим аҳамиятга эга бўлган, чунки тўлиқ ўлчамли пикаплар учун бу янги технология ҳисобланади. Фақатгина GMC Sierra кўп компонентли материаллардан ишланган кузовни тақдим этади, қолган Америка пикапларининг платформаси анъанавий пўлат ва алюминий қотишмаларидан ишланган. Юк платформаларининг стресс-тестларини бунга қадар Chevrolet ва Honda ҳам ўтказган — реклама мақсадида кузовга шлакоблок ва катта тошлар отилганди.
Янги Toyota Тundrа асосий техник тавсифлари бўйича рақобатчиларидан қолишмайди, моделнинг савдолари бошланғич нархига боғлиқ бўлади. Америкалик журналистларнинг тахминича, гибрид бўлмаган двигатель ва стандарт ғилдираклар базаси узунлигига эга пикапнинг нархи 36 минг доллардан бошланади.
Эслатиб ўтамиз, 2020 йилнинг ноябрида Volvo компанияси экстремал краш-тест ўтказиб, унинг давомида ўнлаб автомобилларини 30 метр баландликда ерга ташлаганди.
Изоҳ (0)