Тошкентда метро поездининг эшиклари ёпилмай қолгани сабаб йўловчилар тушириб юборилди

Тошкент метрополитенининг «Чилонзор» йўналишида жойлашган «Халқлар дўстлиги» бекатида поезд вагонларидан бирининг эшигида носозлик кузатилди, деб хабар беради метрополитен матбуот хизмати.

Маълум қилинишича, 22 сентябрь куни соат 08:37 да «Халқлар дўстлиги» бекатида 13-йўналишдаги ҳаракат таркибининг 2-вагонидаги 4-эшиклари техник носозлик туфайли ёпилмай қолган. Ҳаракат хавфсизлигини таъминлаш мақсадида йўловчилар ушбу поезддан туширилган. Ортдан келаётган 5-йўналишдаги ҳаракат таркиби бир дақиқада етиб келиб, йўловчиларни олиб кетган.

«Келтирилган ноқулайликлар учун йўловчилардан узр сўраймиз», — дейилади хабарда.

Қайд этиш жоизки, март ойидан буён Тошкент метрополитени билан боғлиқ шу каби воқеалар тез-тез юз бермоқда. Хусусан, 18 март куни «Олмазор» (Чилонзор йўли) ва «Бекат-1» (Сергели йўли) орасидаги туннелда икки поезд тўқнашганди.

9 апрель куни ижтимоий тармоқларда поезднинг очиқ эшиклар билан ҳаракати туширилган видео тарқалди. Шу билан бирга, метрополитендаги ерости ва ерусти поезд ҳаракатларининг бир нечта бошқа видеолари ҳам ижтимоий тармоқларда кўп бора муҳокама қилинди. 28 апрель куни эса туннелда тўхтаб қолган поезд ҳақидаги видео тарқалди, унда йўловчилар рельслар орқали ҳаракатланиб, бекатга етиб олгани тасвирланган. 13 май куни «Амир Темур хиёбони» бекатида барча йўловчилар тушириб юборилганди. 20 июнь куни «Олмазор» бекатида ҳам худди шу каби ҳолат юз берган, 28 август куни Тошкент метроси поездида кузатилган носозлик сабаб йўловчилар «Тошкент» бекатида тушириб қолдирилган, 20 сентябрь куни эса Тошкентда метро поезди «Ғофур Ғулом» бекатида тўхтаб қолганди.