Андижонда сўнгги беш йил давомида вилоятда истиқомат қилаётган 7305 нафар фуқаролиги бўлмаган шахснинг 5035 нафарига Ўзбекистон фуқаролиги берилган. Бу ҳақда «Дарё» мухбири Умиджон Мамарасулов хабар бермоқда.
Таъкидланишича, вилоят Миграция ва фуқароликни расмийлаштириш бошқармаси томонидан ўтказилган матбуот анжуманида миграция ва фуқароликни расмийлаштириш тизими фаолиятини такомиллаштириш, соҳа ишини ривожлантириш борасида олиб борилаётган ҳамда 2021 йилнинг саккиз ойи давомида амалга оширилган ишлар ҳақида маълумот берилган.
Бошқарма бошлиғи вазифасини бажарувчи, подполковник Жаҳонгир Исмоиловнинг қайд этишича, сўнгги беш йил давомида мурожаат қилган 3542 нафар фуқаролиги бўлмаган шахснинг 2891 нафарига Президент фармони асосида Ўзбекистон фуқаролиги берилган.
«2016 йилда вилоятимизда 7305 нафар фуқаролиги бўлмаган шахс истиқомат қилган бўлса, айни пайтда уларнинг сони 2270 тани такшил этади. Қайд этиш лозим, 2016 йилдан ҳозирги кунга қадар жами 3542 нафар фуқаролиги бўлмаган шахс Ўзбекистон фуқаролигини олиш учун мурожаат қилган. Шундан 2891 нафарининг мурожаати қаноатлантирилиб, Президентимизнинг тегишли фармонлари асосида 2017 йилда 108 нафар, 2018 йилда 598 нафар, 2019 йилда 1327 нафар, 2020 йилда 585 нафар, 2021 йилнинг ўтган даврида эса 268 нафарига Ўзбекистон Республикаси фуқаролик паспорти берилган. 145 нафар шахснинг эса илтимосномаси Фуқаролик масалалари комиссияси томонидан қаноатлантирилмаслиги маълум қилинди. Қолган мурожаатлар эса кейинги босқичда кўриб чиқиш учун юқори ташкилотларга юборилган», — дейди Жаҳонгир Исмоилов.
Қўшимча қилинишича, 2020 йилнинг 10 март куни қабул қилинган «Ўзбекистон Республикасининг фуқаролиги тўғрисида»ги қонун ҳамда 2021 йилнинг 14 июнь куни қонунга киритилган қўшимча ва ўзгартиришларга мувофиқ мамлакатда 15 йилдан буён доимий истиқомат қилиб келаётган фуқаролиги бўлмаган шахсларга тўғридан-тўғри фуқаролик беришнинг янги тартиби жорий этилган.
«‘Ўзбекистон Республикасининг фуқаролиги тўғрисидаъги қонуннинг 6-моддасига асосан 1995 йил 1 январь кунига қадар Ўзбекистон Республикаси ҳудудига кўчиб келиб доимий рўйхатдан ўтиб, вилоят ҳудудида истиқомат қилувчи фуқаролиги бўлмаган шахсларнинг 1419 нафарига, киритилган қўшимча ва ўзгартиришларга асосан эса 15 йил давомида доимий яшаб келаётган 725 нафар шахсга Ўзбекистон Республикаси фуқаролик паспорти расмийлаштириб берилди», — дейди подполковник Жаҳонгир Исмоилов.
«Дарё» мухбирининг қўшимча қилишича, матбуот анжумани якунида фуқароликка қабул қилинган 10 нафар фуқаролиги бўлмаган шахсга Ўзбекистон Республикаси фуқаросининг идентификация ID-карталари тантанали равишда топширилган.
Изоҳ (0)