АҚШнинг Нью-Йорк штати губернатори «Генри» довули яқинлашиб келаётгани туфайли фавқулодда ҳолат режимини эълон қилди. Бу ҳақда у ўз Twitter’ида маълум қилди.
«‘Генри’ довули туфайли фавқулодда ҳолат эълон қилдим. Миллий гвардиянинг 500 ҳарбий хизматчиси сафарбар қилинди, штат ресурслари бўронга нисбатан чоралар кўриш учун тайёрлаб қўйилди», — деб ёзди Эндрю Куомо.
Унинг сўзларига кўра, «Генри» биринчи тоифали довуллар қаторига киради, бу унинг эҳтимолий тезлиги соатига 80 мил (128 км) эканини билдиради. Ноқулай об-ҳаво сабабли ҳукумат Озодлик ҳайкалини ташрифлар учун ёпиб қўйди.
АҚШ Довулларни кузатиш миллий маркази маълум қилишича, «Генри» шимоли-шарққа қараб ҳаракатланмоқда. Шу муносабат билан бўрон ва кучли жала ушбу ҳудудда якшанба куни (22 август) эрталабдан кутилмоқда.
АBC News қайд этишича, Нью-Йоркда ва Коннектикутда темир йўл қатнови ва метрополитен фаолияти тўхтатилади. Бундан ташқари, авиақатновлар ҳам тўхтатилиши мумкин. Агентлик маълумотларига кўра, бўрон ва тропик пўртана ҳақидаги огоҳлантиришлар бешта штатдаги 55 миллиондан ортиқ одамга юборилган.
Изоҳ (0)