Исроил ҳарбийлари ҲАМАС ҳаракатининг қурол ишлаб чиқариладиган объектларига зарба берди, деб ёзади «РБК» Исроил Мудофаа армиясига таяниб.
«ҲАМАС Исроил ва Ғазо чегарасида келтириб чиқарган шафқатсиз тартибсизликларга жавобан, бизнинг кучларимиз ҳозиргина ҲАМАСнинг қурол ишлаб чиқарувчи тўртта объектига ва омборларига зарба берди», — дейилади хабарда.
Фаластин ҳукумати маълумотларига кўра, қочқинлар лагерлари ҳам ҳужум остида қолган. Фаластинликлар бунга жавобан Исроил самолётларини йирик калибрли пулемётлардан ўққа тутган.
Аввалроқ, 21 август куни Ғазо секторининг шимолий чегарасида норозилик намойишларига чиққан фаластинликлар ва полиция ўртасида тўқнашув юз берди. Ҳарбийлар маълум қилишича, намойиш иштирокчилари тўсиқ иншоотларидан ошиб ўтиб, ҳарбий хизматчиларга қарата портловчи қурилмаларни улоқтирган.
Исроил армияси бир аскар яраланганини маълум қилган. Ҳарбийлар бунга жавобан намойишчиларга қарши резина ўқлар қўллаган, оқибатда 41 нафар фаластинлик жабрланган, яраланганлар орасида 13 ёшли бола ҳам бўлган.
Ғазодаги намойишлар Қуддусдаги «Ал-Ақсо» масжиди ёқиб юборилган кун (1969 йил 21 августда ёқиб юборилган) муносабати билан бошланди. Ўшанда Австралиядан келган сайёҳ Майкл Рохан ушбу жиноятга қўл урган, кейинроқ Исроил ҳукумати уни ақли норасо деб топиб, руҳий шифохонага жойлаштирди, сўнг уйига депортация қилди.
Ёнғин оқибатида қимматбаҳо тарихий буюмлар, шу жумладан, султон Салоҳиддин томонидан келтирилган ёғоч минбар йўқ бўлиб кетган.
Фаластинликлар ҳар йили август ойининг сўнгги ҳафтасида ушбу қилмишни қораловчи акциялар ташкил қилади.
Изоҳ (0)