Кобул аэропорти 48 соатга ёпилади

Кобул аэропорти яқин икки кунга ёпилади, бу аллақачон унинг ҳудудида бўлиб турган одамларни эвакуация қилиш учун керак. Тегишли қарор эвакуация устидан назорат олиб бораётган Америка ҳарбийлари томонидан қабул қилинган, деб ёзади Афғонистоннинг Khaama Press агентлиги давлат департаментига таяниб.

Агентлик қайд этишича, аэропорт яқинида минглаб эркак, аёл ва болалар тўпланган бўлиб, улар жазирамада кутиб ўтиришга мажбур.

Буюк Британия Мудофаа вазирлиги маълумотларига кўра, Кобул аэропорти остоналарида тиқилинч ва иссиқ ҳаво оқибатида етти нафар афғонистонлик ҳалок бўлган.

Таъкидланишича, вазият ўта мушкул бўлиб қолмоқда. «Муаммони иложи борича хавфсиз тарзда ҳал қилиш учун барча имкониятларимизни ишга соляпмиз», — дейилади муассаса хабарида.

Sky News хабарига кўра, минглаб афғонлар аэропорт ҳудудига кириб олишга уринмоқда, аммо уларнинг кўпчилиги «Толибон» томонидан эгалланган Афғонистонда эвакуация қилиниши мумкин бўлган фуқаролар тоифасига кирмайди. Одамлар кеча-ю кундуз қуёш тиғи остида турибди, кўпчилик иссиқдан ҳушини йўқотмоқда.

Афғонистонликларни эвакуация қилиш 15 августда «Толибон» Афғонистон устидан назорат ўрнатганини эълон қилган куни бошланди. The Wall Street Journal манбаларига кўра, АҚШ эвакуацияга тижорий авиакомпанияларни жалб қилмоқчи. Рейслар сонини ошириш учун бешта авиакомпаниянинг 20 га яқин самолётларини жалб қилиш режалаштирилмоқда.

Аввалроқ «Толибон» жангарилари Кобул аэропортидаги эвакуация жараёнига аралашишга уринган тақдирда, АҚШ уларга тезда жавоб қайтариши ҳақида огоҳлантирган эди.

«Толибон» Кобул аэропортидаги эвакуация ишларига аралашмасликка ваъда берган. Аммо америкаликлар ва уларнинг иттифоқчилари билан ҳамкорлик қилган афғонистонликлар «Толибон» уларнинг кетишига тўсқинлик қилишидан қўрқмоқда.

The New York Times хабарига кўра, «Толибон» сўроқ қилиш ва жазолаш учун АҚШ ҳарбийлари билан ҳамкорлик қилган афғонларни қидира бошлаган. NYT таъкидлашича, «Толибон» рўйхатдаги одамларни жумладан Кобул аэропорти яқинидан ҳам қидирмоқда, аэропорт ҳозир мамлакатни тарк этиш мумкин бўлган ягона жой.