21 август куни Мексикада «Грэйс» довули оқибатида саккиз киши ҳалок бўлди. Бу ҳақда Веракрус штати губернатори Куитлауак Гарсия маълум қилди. Ҳалок бўлганлар орасида олти нафари болалардир.
Шунингдек, штат ҳудудида тунда 330 минг киши чироқсиз қолган, электр узатилиши аста-секинлик билан тикланмоқда.
Губернатор ҳудуд аҳолисини огоҳлантиришича, дарёлар сатҳи кўтарилишда давом этиши мумкин, тепаликлар қияликлари намиқиб қолгани сабабли эса ер кўчишлари юз бериши мумкин.
«Грэйс» довули Мексиканинг Атлантика соҳилларига 21 август куни ёпирилди. Оқибатда Веракрус, Пуэбла, Тласкала, Идалго, Керетаро ва Сан-Луис-Потоси штатлари жабрланди.
Унинг тезлиги соатига 201 километрни ташкил қилди. Довул билан бирга кучли ёмғирлар ҳам кириб келди, ёғин миқдори 30 сантиметрдан кўпроқни ташкил этди. Кейинроқ довул сусайиши билан, синоптиклар уни тропик бўрон даражасигача «туширди».
Довул ёпирилиши муносабати билан 22 та муниципалитетда фавқулодда вазият режими эълон қилинди.
Бир қатор курорт шаҳарларда ноқулай об-ҳаво оқибатида вайронагарчиликлар юзага келди. Хусусан, мамлакат жанубидаги Тулумда электр ва телекоммуникация инфратузилмасининг 50 фоизига зарар етди.
Бундан ташқари, Отон-Бланко ва Солидаридад шаҳарларида дарахтлар қулаши ва йўлларнинг сув остида қолиши ҳолатлари кузатилди.
Изоҳ (0)