AQShda sodir bo‘lgan tornado yuzlab uylarga zarar yetkazdi (video)

AQShning Alabama va Texas shtatlarida tornado sodir bo‘ldi va deyarli 70 ming uy elektr energiyasidan uzilib qoldi. Bu haqda “Korrespondent.net” xabar berdi.

Tabiiy ofat oqibatida yuzlab uylar zarar ko‘rdi, daraxtlar quladi, bir nechta trassa yopilib qoldi.

Bu shtatlarda noqulay ob-havo tufayli vaksinatsiya vaqtincha to‘xtatilgan. Maktab o‘quvchilari masofaviy ta’limga o‘tkazilgan.

AQShning ob-havo xizmati yaqin kunlarda tornado yuzaga kelish xavfi haqida 50 ta ogohlantirish bergan.

Shuningdek, AQShning Shimoliy Karolina shtatida 16-fevral kuni tornado kuzatildi. Tabiiy ofat oqibatida kamida uch nafar odam halok bo‘lgan, yana o‘n kishi turli darajadagi jarohatlar oldi.

Avvalroq AQShning markaziy qismida kuchli qor bo‘roni sodir bo‘lgani haqida xabar berilgandi. Yog‘ingarchilik mahalliy vaqt bilan 14-mart, yakshanba kuni ertalab boshlangan. Markaziy shtatlarni qor, do‘l va yomg‘ir shaklidagi bo‘ron qoplab oldi. Janubiy Missuri, Kanzas va Nebraskada bo‘ron oqibatida toshqinlar kelib chiqdi.