Uzbekistan Airways бошқа авиакомпаниялар самолётлари қатори Афғонистон ҳудудини айланиб ўтишни бошлади. Бунга «Новости Ташкентского неба» Telegram канали эътибор қаратди.
17 август куни авиакомпаниянинг Boeing 787-8 Dreamliner, UK-78706 самолёти Афғонистон ҳаво ҳудудини четлаб ўтиб, Тошкент—Деҳли—Тошкент йўналиши бўйича HY-421 / HY-422 рейсларини амалга оширди.
«Афтидан, парвоз давомийлиги узайди — одатда, бу (бир томонлама) парвоз, тахминан, 2,5 соат давом этган бўлса, бугун учиш вақти 3 соат 53 минутни ташкил этди», — деб қайд этилган хабарда.
Uzbekistan Airways Тошкент—Деҳли—Тошкент йўналиши бўйича парвозларни ҳафтада бир маротаба — сешанба кунлари амалга оширади. Ушбу йўналиш 5 мартдан қайта тикланганди. Ўшанда парвозлар ҳафтада икки марта — сешанба ва жума кунлари амалга ошириларди. 18 июлдан бошлаб эса Ҳиндистонда юзага келган эпидемиологик вазият муносабати билан жума кунлари амалга ошириладиган рейслар бекор қилинди.
Эслатиб ўтамиз, 15 август куни «Толибон» Афғонистоннинг бутун ҳудудини ўз назорати остига олганини эълон қилди. 16 август куни Афғонистон фуқаро авиацияси авиакомпанияларга мамлакат ҳаво ҳудудини айланиб ўтишни тавсия этди.
Шу куниёқ United Airlines, British Airways ва Virgin Atlantic авиакомпаниялари Афғонистон ҳаво ҳудудидан фойдаланишни тўхтатди. 17 август куни улар қаторига Air France-KLM, Lufthansa, Qatar Airways, Singapore Airlines, China Airlines ва бошқа авиакомпаниялар қўшилди.
Изоҳ (0)