49 миллион сўмдан 122,5 миллион сўмгача: халқаро фан олимпиадалари ғолиблари ва уларнинг ўқитувчилари тақдирланди

2021 йилнинг 17 август куни Тошкент шаҳрида нуфузли халқаро фан олимпиадалари ғолиблари ва уларнинг ўқитувчиларини тақдирлаш маросими бўлиб ўтди. Бу ҳақда «Дарё» мухбири хабар бермоқда.

Таъкидланишича, 2021 йилнинг июль—август ойларида нуфузли халқаро фан олимпиадаларида ўзбекистонлик ёшлар томонидан жами 10 та (2020 йилда 6 та) медаль, хусусан, 25 июль — 2 август кунлари Японияда ўтказилган 53-Халқаро кимё олимпиадасида 1 та олтин ва 3 та бронза, 14—24 июль кунлари Россия мезбонлик қилган 62-Халқаро математика олимпиадасида 1 та кумуш ва 1 та бронза, 18—23 июль кунлари Португалияда бўлиб ўтган 32-Халқаро биология олимпиадасида 2 та олтин ва 1 та кумуш, 17—24 июль кунлари Литвада ўтказилган 51-Халқаро физика олимпиадасида битта бронза медаллари қўлга киритилди.

«Давлат раҳбарининг 2019 йил 3 майдаги ‘Иқтидорли ёшларни аниқлаш ва юқори малакали кадрлар тайёрлашнинг узлуксиз тизимини ташкил этиш чора-тадбирлари тўғрисида’ги қарорига мувофиқ фан олимпиадалари ғолибларини рағбатлантиришнинг янги тизими жорий этилди.

Мазкур қарорга кўра, дунёда тан олинган математика (IMO), физика (IphO), кимё (IChO), биология (IBO) ва информатика (IOI) халқаро нуфузли фан олимпиадаларида ғолибликни қўлга киритган ўқувчилар ва уларнинг ўқитувчилари бир марталик пул мукофотлари билан тақдирланади. Шунингдек, улар олий таълим муассасаларига имтиҳонсиз имтиёзли равишда қабул қилинади», — деди халқ таълими вазири Шерзод Шерматов.

Маросим давомида олтин медалга эга чиққан ўқувчиларга базавий ҳисоблаш миқдорининг 500 баравари (122,5 миллион сўм), ўқитувчисига 450 баравари (110,25 миллион сўм), кумуш медални қўлга киритганларга БҲМнинг 300 баравари (73,5 миллион сўм), ўқитувчисига 250 баравари (61,25 миллион сўм), бронза медаль соҳибларига БҲМнинг 200 баравари (49 миллион сўм), ўқитувчисига 150 баравари (36,75 миллион сўм) миқдорида пул мукофоти топширилди.

Бундан ташқари, минтақавий халқаро фан олимпиадалари: 55-Халқаро Менделеев кимё олимпиадаси, 17-Халқаро Жаутиков олимпиадаси, 6-Халқаро Кавказ математика олимпиадаси, 27-Халқаро математика мусобақасида муносиб иштирок этиб, 31 та медаль (2 та олтин, 14 та кумуш ва 15 та бронза)га сазовор бўлган ўқувчилар ҳам пул мукофотлари ҳамда эсдалик совғалари билан тақдирланди.