Наманган вилоятида содир бўлган йўл-транспорт ҳодисаси оқибатида бир нафар ҳайдовчи ҳалок бўлди, деб хабар беради вилояти ахборот хизмати.
Маълум қилинишича, 15 август куни соат 16:30 ларда А-373 Тошкент—Ўш йўлининг 282,5-километрида, «Қўшминор» МФЙ ҳудудида 1966 йилда туғилган фуқаро ўзининг номида бўлган Lacetti русумли автомашинасини Тошкент—Водий йўналишида бошқариб бораётиб, ҳаракат хавфсизлигини таъминлай олмай, ағдарилиб кетган.
Натижада машина шу йўналишда йўл четида тўхтаб турган Фарғона вилоятида яшовчи 1970 йилда туғилган фуқаро бошқарувидаги Nexia-3 нинг орқа томонига урилган.
Авария оқибатида Lacetti ҳайдовчиси олган тан жароҳати оқибатида воқеа жойида вафот этган. Автомашинада бўлган йўловчи — ҳайдовчининг турмуш ўртоғи (1969 йилда туғилган) бош мия ёпиқ шикасти, кўкрак қафасини ёпиқ шикасти ташхиси билан тан жароҳати олиб, шифохонага ётқизилган.
Ушбу ҳолат бўйича Поп туман ИИБ ҳузуридаги Тергов бўлими томонидан 15 август куни Жиноят кодексининг 266-моддаси (транспорт воситалари ҳаракати ёки улардан фойдаланиш хавфсизлиги қоидаларини бузиш) 2-қисми билан жиноят иши қўзғатилган.
Аввалроқ Самарқандда бошқарувни йўқотган Lacetti иккита «Жигули» ва Damas’га урилиши оқибатида бир нафар йўловчи воқеа жойида вафот этгани, Навоийда содир бўлган ЙТҲда Labo ҳайдовчиси ҳалок бўлгани тўғрисида хабар берилганди.
Изоҳ (0)