Туркия Кобул аэропортини бошқариш масъулиятини ўз зиммасига олишдан бош тортди, аммо агар шундай сўров келиб тушса, «Толибон» ҳаракатига техник таъминот ва хавфсизлик соҳасида ёрдам беришга тайёр. Бу ҳақда Reuters Туркия хавфсизлик кучларидаги манбаларига таяниб хабар бермоқда.
«Агар ‘Толибон’ техник кўмак сўраса, Туркия аэропортдаги техника ва хавфсизлик соҳасида ёрдам бериши мумкин», — деди агентлик ҳамсуҳбатларидан бири. Унинг сўзларига кўра, ҳаво бандаргоҳидаги «бутунлай тартибсизлик» фонида «бошқарувнинг туркиялик ҳарбийлар томонидан олиниши автоматик тарзда тўхтатилган».
14 апрель куни АҚШ президенти Жо Байден Афғонистондаги операцияни якунлашга қарор қилди, у АҚШ тарихидаги энг узоқ давом этган хорижий ҳарбий кампанияга айланди. 14 июнь куни Туркия президенти Ражаб Тоййиб Эрдўғон у ердан НАТО қўшинлари олиб кетилгач, агар АҚШ томонидан молиявий кўмак бўлса, Туркия Афғонистонда ҳарбий контингентини сақлаб қолиши мумкинлигини айтди.
Июлда Эрдўғон АҚШ керагича қўллаб-қувватлаб турса, Туркия Кобул аэропортини бошқаришга тайёрлигини билдирди.
Ҳозир Кобул аэропорти Афғонистонни тарк этиш мумкин бўлган ягона жой, аэропорт АҚШ ҳарбийлари назорати остида. Минглаб одамлар учиб кетишни хоҳлайди, 16 август куни эрталаб улар рейслардан бирортасига ўтириш учун аэродромга бостириб кирган ва ерда турган самолётларга осилиб чиқишга ҳаракат қилган. Ҳодиса оқибатида 7 киши ҳалок бўлган.
Эслатиб ўтамиз, 15 август куни «Толибон» Афғонистоннинг бутун ҳудудини ўз назорати остига олганини эълон қилди. Шу куни «Толибон» Кобулдаги президент саройига кирди. Кейинроқ ҳукумат кучлари тарк этган барча давлат муассасаларини ва давлат телевидениесини эгаллаб олди.
Афғонистон президенти Ашраф Ғани истеъфо беришга рози бўлган ва мамлакатни тарк этган. The New York Times ва Al Jazeera Ашраф Ғанининг Ўзбекистонга йўл олгани ҳақида хабар берди. Аммо кейинроқ Ашраф Ғани Ўзбекистонда ҳам, Тожикистонда ҳам, Қозоғистонда ҳам эмаслиги маълум қилинди.
Изоҳ (0)