Германия, Нидерландия ва Чехия самолётлари учиш-қўниш йўлагидаги оломон туфайли Кобул аэропортига қўна олмади, дея хабар бермоқда «Коммерсантъ» BBC’га таяниб.
«Кобулдан одамларни эвакуация қилиш учун юборилган ҳарбий самолёт ушланиб қолмоқда… Бу Кобул аэропортидаги маълум бир шароитлар билан боғлиқ», — дейилади Нидерландия Мудофаа вазирлиги хабарида.
Чехиянинг иккита самолёти Озарбайжонга йўл олган, Германия самолёти эса ёнилғи олиш учун Ўзбекистонга кетган.
Кобул аэропортида мураккаб вазият юзага келган. Ватанини тезроқ тарк этиш истагидаги афғонлар 16 август, душанба куни учиш-қўниш йўлагига югуриб чиқиб, ҳатто, АҚШ Ҳарбий-ҳаво кучларининг ҳаракатланиб кетаётган самолётининг ортидан югурган. Охир-оқибат самолётнинг аэропортдан учиб кетишини тўхтатишга тўғри келган.
Al-Jazeera маълумотларига кўра, Кобул аэрпортидаги тартибсизликлар чоғида етти киши ҳалок бўлган. Аэропортдаги хавфсизликни АҚШ армияси таъминламоқда. Шунингдек, у ерда Британия ҳарбийлари ҳам бор. Ҳарбий хизматчиларнинг вазифаси — Кобулдан чет элликларни, шунингдек, хорижда бошпанага эга бўлган афғонларни тезкорлик билан эвакуация қилиш.
15 август куни «Толибон» жангарилари Кобулга кирди ва Афғонистоннинг бутун ҳудудини назорат остига олганини эълон қилди. Шу куниёқ мамлакат президенти Ашраф Ғани истеъфога чиқиб, мамлакатни тарк этди. У ўз қарорини «қон тўкилишига йўл қўймаслик истаги билан изоҳлади.
Аввалроқ юзлаб одамлар Кобул аэропортида Афғонистондан учиб кетаётган сўнгги самолётларга чиқиб олишга уринди. Бир неча киши ҳалок бўлгани хабар берилган эди. Шунингдек, авиакомпаниялар Афғонистон ҳаво ҳудудини четлаб учишни бошлади.
Изоҳ (0)