Гаитида 14 август куни юз берган 7,2 магнитудали зилзила қурбонлари сони 1419 кишига етди. Уларнинг сони яна ошиши мумкин, деб ёзади Reuters республика фуқаро муҳофазаси бошқармасига таяниб.
Бошқарма раҳбари Жерри Чендлернинг сўзларига кўра, силкинишлар баъзи шаҳарларни вайрон қилган ва кўчкиларга олиб келган, бу эса қутқарув ишларига тўсқинлик қилган.
Маҳаллий ҳукумат маълумотларига кўра, ярадорлар сони 6900 га яқин. Кўпчилик оғир жароҳат олган. Бундан ташқари, зилзила оқибатида 7000 дан зиёд уй вайрон бўлган ва 5000 га яқини зарар кўрган, 30 000 га яқин оила бошпанасиз қолган.
Касалхоналар, мактаблар, офислар ва черковлар вайрон бўлган. Мамлакатда йўллар бузилган, электр таъминоти билан боғлиқ муаммолар бор, ҳукумат ичимлик суви ва дори-дармон танқислиги ҳақида гапирмоқда.
Гаитида 14 август, шанба куни 7,2 магнитудали зилзила юз берди. Унинг кетидан кетма-кет афтершоклар, хусусан, 5,2 магнитудали такрорий ерости силкинишлари кузатилган. Зилзила эпицентри пойтахт Порт-о-Пренсдан 125 километр ғарбда жойлашган. Гаити бош вазири Ариэл Анри мамлакатда бир ойлик фавқулодда ҳолат эълон қилди.
Изоҳ (0)