Лондондаги Тауэр кўприги техник носозлик туфайли кўтарилган ҳолатда қолиб кетди (видео)

Лондондаги Тауэр кўприги бўйлаб ҳаракатланиш техник носозлик туфайли тўхтатилди. Бу ҳақда Лондон полициясига таяниб, Meduza хабар берди.

BBC хабарига кўра, 9 август куни тушдан кейин Тауэр кўприги кема ўтиши учун кўтарилган ва уни қайтариб туширишнинг иложи бўлмаган.

Тауэр кўпригини бошқарувчи Лондон Сити корпорациясининг баёнотига кўра, бузилиш сабаблари ҳозирча номаълум. Кўприкда таъмирлаш ишлари олиб борилмоқда. Кўприк назоратчиларининг сўзларига кўра, бу бир неча соат давом этиши мумкин, деб хабар беради Британиянинг ITV телеканали.

Кўприкнинг ёпилиши туфайли Темза дарёсининг иккала томонида ҳам транспорт ҳаракати секинлашди ва тирбандликлар пайдо бўлди. Ҳайдовчилардан иложи борича Тауэр кўприги ҳудудига яқинлашмаслик сўралган. Кейинроқ кўприкка ўт ўчириш бригадаси етиб келган.

Бу Тауэр кўпригининг бир йил ичида иккинчи марта бузилиши. 2020 йил август ойида ҳам кўприк  кўтарилган ҳолатда қолиб кетган. Ўшанда у бир кунга ёпилганди.

Тауэр кўприги — Лондоннинг энг диққатга сазовор жойларидан биридир. У 1894 йилда қурилган. Кўприк йилига тахминан 800 марта кўтарилади.