Londondagi Tauer ko‘prigi bo‘ylab harakatlanish texnik nosozlik tufayli to‘xtatildi. Bu haqda London politsiyasiga tayanib, Meduza xabar berdi.
BBC xabariga ko‘ra, 9-avgust kuni tushdan keyin Tauer ko‘prigi kema o‘tishi uchun ko‘tarilgan va uni qaytarib tushirishning iloji bo‘lmagan.
Tauer ko‘prigini boshqaruvchi London Siti korporatsiyasining bayonotiga ko‘ra, buzilish sabablari hozircha noma’lum. Ko‘prikda ta’mirlash ishlari olib borilmoqda. Ko‘prik nazoratchilarining so‘zlariga ko‘ra, bu bir necha soat davom etishi mumkin, deb xabar beradi Britaniyaning ITV telekanali.
Ko‘prikning yopilishi tufayli Temza daryosining ikkala tomonida ham transport harakati sekinlashdi va tirbandliklar paydo bo‘ldi. Haydovchilardan iloji boricha Tauer ko‘prigi hududiga yaqinlashmaslik so‘ralgan. Keyinroq ko‘prikka o‘t o‘chirish brigadasi yetib kelgan.
Bu Tauer ko‘prigining bir yil ichida ikkinchi marta buzilishi. 2020-yil avgust oyida ham ko‘prik ko‘tarilgan holatda qolib ketgan. O‘shanda u bir kunga yopilgandi.
Tauer ko‘prigi — Londonning eng diqqatga sazovor joylaridan biridir. U 1894-yilda qurilgan. Ko‘prik yiliga taxminan 800 marta ko‘tariladi.
Izoh (0)