АҚШ Беларусга қарши янги санкциялар жорий қилди. Бу ҳақда Оқ уйнинг расмий сайтида маълумот берилди.
Санкциялар рўйхати АҚШ Молия вазирлигининг сайтида эълон қилинган. АҚШ Беларуснинг 23 нафар жисмоний ҳамда 21 та юридик шахси, яъни мудофаа ва энергетика соҳаси компаниялари, ишлаб чиқариш сектори корхоналари ҳамда мамлакат Миллий олимпия қўмитасига нисбатан чекловлар ўрнатди.
«Мен, АҚШ президенти Жозеф Байден, Беларусь бошқарув режимининг зўравонлик фаолияти, демократияга босим ўтказиш ҳаракатлари, инсон ҳуқуқлари ва мамлакатдаги бошқа асосий эркинликларга тазйиқ ўтказгани аниқлангани туфайли мазкур қарор билан 2006 йил 16 июндаги 13405-сонли фармондаги фавқулодда ҳолат кўламини янада кенгайтираман»,— дейилади Оқ уй баёнотида.
Шунингдек, хабарда 2020 йил 9 августда Беларусда бўлиб ўтган президентлик сайловларининг натижалари қалбакилаштирилганидан кейин амалдаги ҳукумат ноқонуний ва зўравонлик сиёсатини олиб борган, сиёсий мухолифатни, фуқаролик жамияти ташкилотларини йўқотиш, халқаро фуқаролик авиацияси қоидаларини бузиш ва инсонлар ҳаётини хавф остига қўйиш каби ҳаракатлар амалга оширилгани қайд этилган. Байден буларнинг ҳаммаси АҚШ миллий хавфсизлиги ҳамда ташқи сиёсатига фавқулодда таҳдид деб ҳисоблашини билдирган.
Санкцияларнинг кенгайтирилган рўйхатига қуйидаги муассасалар киритилган:
- Беларусь Тергов қўмитаси;
- Беларусь Миллий олимпия қўмитаси (МОҚ)
- «Белнефтгаз»;
- «Белрускалий»;
- «БелКазТранс»;
- «БелКазТранс Украина»;
- «Абсолютбанк»;
- «Энегро-ойл»;
- «Новая нефтяная компания»;
- «Дана Ҳолдингз»;
- «Дана Астра»;
- Гомель вилояти ижро қўмитасининг жиноят қидирув департаменти;
- Нефтебитум заводи унтар корхонаси;
- Bremino group;
- «Белинте-Роба»
- «Зомекс Инвестмент»;
- «Интер Тобакко»;
- «Новая нефтяная компания Восток»;
- «Интерсервис».
Беларусь мухолифати вакили Светлана Тихановская АҚШ президенти билан учрашувда ўзининг 2020 йилги сайловларда ғалаба қозонганини қайд этиб, мамлакатга нисбатан санкцияларни кучайтиришни сўраганди. Тихановская Жо Байден билан 20 июлда учрашган. Шундан кейин Тихановскаянинг маслаҳатчиси Франак Вячорка АҚШ давлат департаменти вакилларининг Беларусь нефть маҳсулотлари ҳамда калий ишлаб чиқариш корхоналарига нисбатан санкцияларни кўпайтириши мумкинлигини маълум қилган. 7 августда CNN нашри АҚШ конгрессидаги манбасига таяниб, Вашингтоннинг Минскка нисбатан янги санкциялар жорий қилиши кутилаётганини хабар қилган.
Тихановская 3 августда Буюк Британия бош вазири Борис Жонсон билан ҳам учрашган, учрашувда икки томон Беларусдаги фуқаролик жамияти, сиёсий маҳбуслар ва уларнинг оилаларига, талабаларга, тиббиёт ходимлари, ишчилар ва бошқа аҳоли қатламларига ёрдам бериш дастурини муҳокама қилган.
2021 йил июнь ойида ҳам АҚШ Беларусга қарши санкцияларни янада кенгайтирган, 16 нафар жисмоний шахс, 5 та идора ва ташкилотга нисбатан чекловлар жорий қилинганди. Кейинчалик Европа Иттифоқи ҳам Беларусга қарши янги санкциялар қўллаган. Минск мазкур чекловларни иқтисодий урушга қиёслаган.
Изоҳ (0)