Гурбангули Бердимуҳамедов ўғли билан бирга «Аваза»даги спортзалга борди (фото)

2021 йил 1 августдан Туркманистон ҳукуматидаги раҳбарларни таътилга чиққанини эълон қилган мамлакат президенти Гурбангули Бердимуҳамедов 7 августда «Аваза» миллий сайёҳлик зонасида жойлашган «Аваза» спорт мажмуасига ўғли Сердар Бердимуҳамедов билан бирга борди. Бу ҳақда Туркманистон давлат ахборот агентлигига таяниб «Хроника Туркменистана» хабар берди.

«Тренажёрларда бир нечта машқларни бажарган президент ўзининг ажойиб спорт формасида эканлигини яна бир бор намойиш қилди», — дейилади Туркманистон давлат ахборот агентлигининг хабарида.

Нашрнинг қайд этишича, бош вазир ўринбосари, Туркманистонда хизмат кўрсатган мураббий унвонига эга Сердар Бердимуҳамедов ҳам спорт мажмуасига ташрифи давомида бир нечта машқларни бажарган.

Эслатиб ўтамиз, Шавкат Мирзиёев 5 август куни «Аваза» миллий сайёҳлик зонасида бўлиб ўтадиган Марказий Осиё давлатлари раҳбарларининг навбатдаги Маслаҳат учрашувида иштирок этиш учун Туркманбошига борган, у ерда Гурбангули Бердимуҳамедов билан учрашув ўтказган, 6 августда Қирғизистон президенти Садир Жапаров билан музокара олиб бориб, 11—12 март кунлари Қирғизистон президентининг Ўзбекистонга давлат ташрифи чоғида эришилган келишувлар ижросининг бориши батафсил муҳокама қилган, шунингдек, ушбу санада Марказий Осиё давлатлари раҳбарлари Туркманбошидаги саноат кўргазмасини кўздан кечирган, Марказий Осиё халқларининг миллий таомлари фестивали ва тантанали концертида иштирок этган.