OpenAI нозик мавзуларда фойдаланувчилар билан мулоқот қилишда масъулиятни оширишга қаратилган ChatGPT хулқ-атвор моделининг янгиланишини эълон қилди. Энди чат-бот “жуфтидан ажралиш керакми” каби шахсий ёки ҳиссий сўровларга тўғридан-тўғри маслаҳат бермайди, деб хабар бермоқда Business Insider (BI).
-CJJcyFJw.avif)
Бундан буён тизим ажралиш бўйича маслаҳатлар ўрнига фойдаланувчига вазиятни турли томондан кўриб чиқишни таклиф этади, йўналтирувчи саволлар беради ва шахсий фикрни шакллантиришга кўмаклашади.
Компаниянинг таъкидлашича, ўзгаришларнинг мақсади мураккаб ҳаётий вазиятларда ChatGPT’нинг фойдалилигини оширишдир. OpenAI аввалги янгиланиш давомида модел ҳаддан ташқари келишувчан бўлиб қолганини тан олган. Бу хатти-ҳаракатлар энди тузатилган.
Бундан ташқари, узоқ давом этадиган суҳбатларда ChatGPT фойдаланувчига танаффус қилиш кераклигини эслатиб туришни бошлайди. Бундай тавсияларни бериш усули иложи борича табиий бўлиши ва безовталикка сабаб бўлмаслиги учун такомиллаштирилади.
Шунингдек, OpenAI руҳий саломатлик, ўсмирлар психологияси ва инсоннинг сунъий интеллект билан ўзаро муносабати бўйича мутахассислардан иборат экспертлар кенгашини тузган. Ташаббусга 30 мамлакатдан 90 дан ортиқ тиббиёт соҳасидаги мутахассислар жалб қилинган.
Бундан аввал OpenAI ChatGPT’да билимларни босқичма-босқич мустаҳкамлашга мўлжалланган янги функция — “Ўқув режими”ни (Study Mode) тақдим этди.
Изоҳ (0)