Португалияда истиқомат қилган кекса эр-хотин ва уларнинг кенжа ўғли вакцина олишдан бош тортганидан кейин COVID-19 оқибатида вафот этди. Бу ҳақда The Guardian нашрига вафот этган оиланинг тўнғич ўғли Францис Гонсалвес маълум қилди, деб ёзади «РБК».
Гонсалвеснинг фикрича, унинг онаси Шарман ва укаси Шаул коронавирусни оилавий тушлик чоғида юқтириб олган, касаллик манбаси унинг 73 ёшли отаси Безил бўлган. У бунгача касалхонада ётиб, коронавирусдан даволанган. Оила COVID-19’га қарши эмланмаган. «Улар вакцинага қарши курашувчилар тарғиботлари таъсирига тушиб қолган эди», — деди Гонсалвес.
Оилавий тушликдан кейин 40 ёшли Шаул ва унинг отасининг аҳволи ёмонлашган. Доим тетик бўлиб, соғлом турмуш тарзини олиб борган ва фақат ўсимлик маҳсулотлари билан озиқланган Шаул акасига «ўзини гўёки вазн йиғиб, чарчагандек ҳис қилаётганини» айтган. Унинг ота-онасида эса саломатлик билан боғлиқ жиддий муаммолар бўлган.
Френсис Гонсалвеснинг ўзи Уэльс пойтахти Кардиффда яшайди ва бош ошпаз бўлиб ишлайди. У Португалияга етиб борганида онаси сунъий кома ҳолатида ётган, укаси ва отаси эса аллақачон вафот этган. Гонсалвесларнинг учаласи ҳам Лиссабондаги қабристонга дафн этилган.
Аввалроқ АҚШнинг Калифорния штатида COVID-19 пандемияси даврида одамларнинг эмланишига қарши курашган 34 ёшли блогер Стивен Гармон коронавирусдан вафот этган эди.
Изоҳ (0)