Коронавируснинг янги штаммларини номлаш учун грек ҳарфлари етмай қолса, уларга юлдуз туркумлари (буржлар) номлари берилади. Бу ҳақда Жаҳон соғлиқни сақлаш ташкилоти (ЖССТ) фавқулодда касалликлар бўлинмасининг техник гуруҳи раҳбари Мария Ван Керкхове Британиянинг The Telegraph нашрига берган интервьюсида маълум қилди.
«Бизга грек алифбоси етмай қолиши эҳтимолдан холи эмас, аммо биз кейинги номлар гуруҳини кўриб чиқяпмиз. Биз ҳақиқатан ҳам юлдуз туркумлари вариантини кўриб чиқяпмиз», — деди у.
Унинг сўзларига кўра, аввалроқ ЖССТ қадимий юнон маъбуд ва маъбудалари исмларидан фойдаланишни ўйлаб кўрган, аммо бу вариантдан воз кечишга қарор қилинган.
Эслатиб ўтамиз, ёз бошида Жаҳон соғлиқни сақлаш ташкилоти вариантлари энди грек алифбоси ҳарфлари билан белгиланиши, бундан мақсад — ушбу штаммлар биринчи марта аниқланган мамлакатларни дискриминация қилмаслик эканини маълум қилганди. Таъкидланишича, COVID-19 вариантларини улар топилган жойлар билан аташ «камситувчи ва обрў тўкувчи хусусиятга эга бўлиши мумкин», шу сабабли номларнинг янги тизими яратилган.
Коронавируснинг янги, юқумлироқ штамми аниқлангани ҳақида биринчи марта Буюк Британия ҳукумати 2020 йил декабрида маълум қилганди. Яна битта штамм пайдо бўлгани ҳақида 2021 йил мартида Ҳиндистон ҳукумати хабар берди. Шунингдек, вируснинг янги вариантлари Бразилия, Жанубий Африка Республикаси, Вьетнам ва бошқа мамлакатларда аниқланди.
Изоҳ (0)