Францияда ёшлар Pass Sanitaire санитария рухсатномасини олиш шарти сифатида коронавирусга қарши эмланмаслик учун атайлаб вирусни ўзларига юқтирмоқда. Бу ҳақда Focus нашри хабар берди.
Францияда жамоатчилик жойларига ташриф буюриш учун санитария рухсатномасига эга бўлиш шарт, у эса фақат касалланиб ўтган ёки вакцина олган французларга берилади.
Ёшлардан бири нашрга маълум қилишича, тезроқ вирусни юқтириш, сўнг соғайиб, рухсатнома олиш учун улар ниқоб тақмай ва қўлларини ювмай қўйган. Улар иммунитет «касалликни табиий йўл билан енгиш»ни ўрганиши тарафдори.
«Умримнинг охиригача ҳар уч ойда вакцина олганимдан кўра, бир марта COVID-19 га чалинганим афзалроқ», — деб ёзади яна бир йигит ижтимоий тармоқда.
Касалликка нисбатан бундай муносабатни мутахассислар қораламоқда. «Улар ҳақиқий хавфни тушунмаяпти. Вирус билан бундай ўйинларни ўйнаш — бутунлай хато иш. Ёшлар ўзларини хавфсиз ҳис қилиб келаётган эди, аммо сўнгги вақтларда COVID-19 га чалиниб, интенсив даволаш бўлимларида ётган беморларнинг ўртача ёши пасайди. Инфекция дастлаб симптомсиз кечса-да, унинг узоқ муддатли асоратлари хавфини истисно қилиб бўлмайди», — дея аниқлик киритди эпидемиолог Филипп Амуаел.
Айни пайтда Францияда санитария рухсатномаларига қарши норозилик акциялари давом этмоқда. 7 август, шанба куни мамлакатнинг 150 та шаҳарларида камида 237 минг киши намойишларда қатнашди, Парижнинг ўзида 17 минг киши кўчаларга чиқди.
Бу санитария рухсатномалари жорий этилишига қарши қарши фуқаролар оммавий норозиликлар уюштираётган тўртинчи шанбадир. Ўтган сафар, Ички ишлар вазирлиги маълумотларига кўра, намойишларда 204 минг киши қатнашган. Шу сафар норозилик акцияларига ҳатто кучли ёмғирлар ҳам халал бера олмади, Парижда акциялар дўл остида якунланди.
Бутун мамлакат бўйлаб 198 та норозилик акцияси бўлиб ўтди, умуман олганда, вазият тинчиган бўлган бўлса-да, баъзи жойларда полиция билан тўқнашувлар юз берди, оқибатда намойишчиларга қарши кўзни ёшлантирувчи газ қўлланилди. 35 киши қўлга олинди, етти нафар полициячи енгил жароҳатлар олди.
Санитария рухсатномасига қарши бўлганлар фикрича, ҳукумат вакцина олмаган фуқароларнинг ҳаракатланишини чеклаб қўйиш орқали, уларнинг асосий ҳуқуқларини бузмоқда. Франция мухолифати ҳукумат янги чекловларни ҳеч бўлмаганда кечиктириб туриши керак, деган фикрда.
Шу ҳафта Франция Конституциявий кенгаши санитария рухсатномалари амал қиладиган зоналарни кенгайтириш ҳақидаги қонун лойиҳасини маъқуллади, хусусан, ресторанларга ташриф буюриш, мамлакат ичида поезд ва самолётларда сафар қилиш ҳам киритилди. Ушбу қонун лойиҳаси аввалроқ Франция парламентининг иккала палатаси томонидан ҳам маъқулланган эди.
Айнан Конституциявий кенгаш ҳукумат томонидан режалаштирилган чораларнинг маъқулланишига тўсқинлик қилиш имкониятига эга бўлган сўнгги инстанция эди.
Франция ҳукумати режаларига кўра, қонун 9 август куни кучга киради. У ҳолда 9 августдан кафе ва ресторанларга киришда, транспортга чиқишда (шаҳар жамоатчилик транспортидан ташқари) санитария рухсатномасини тақдим этиш керак бўлади. Ушбу ҳужжатда фуқаронинг COVID-19 га қарши эмлангани ёки яқинда вирусга қарши манфий натижали тест топширгани кўрсатилиши керак.
Изоҳ (0)