Jizzaxdagi Zomin tog‘larida 1-avgust kuni yong‘in chiqqani, olovni o‘chirish uchun 400 ga yaqin xodim va 4 ta vertolyot jalb etilgani haqida xabar berilgan edi. Telegram’dagi AviaSpotter kanalining ma’lum qilishicha, yong‘inni o‘chirishga O‘zbekiston Mudofaa vazirligining AirBus X215 SuperPuma vertolyotlari jalb qilingan.

Gidrometeorologik ilmiy tahlillar, ob-havo prognozlari, tadqiqotlar, ma’ruzalar kanalining yozishicha, yong‘inlarning tarqalishi asosan, shamol omiliga bog‘liq bo‘lib, shamolning yo‘nalishiga qarab yong‘in maydonlari kengayib boradi. Jizzax viloyatining Zomin tumani tog‘li hududlarida shamol yo‘nalishi shimoli-g‘arbdan, ya’ni tekislikdan tog‘ga tomon esgani uchun ijtimoiy tarmoqlarda tarqalayotgan videolarda yong‘inlarning yuqoriga tomon yo‘nalayotganini ko‘rish mumkin.

Tog‘ vodiy shamollari kunduz kuni tekislikdan tog‘ tomon, kechasi tog‘dan tekislik tomon harakatlanadi. Boshqacha aytganda, kechasi mahalliy vaqt soat 20:00 dan so‘ng shamol yo‘nalishi tog‘dan pastga tomon harakatlana boshlaydi. Bu hozirgi yong‘in avj olayotgan hududlar uchun xavflidir. Chunki yong‘in maydoni to‘liq o‘chirib ulgurilmasa, kechasi harakat yo‘nalishi pastga, qishloqlar tomon yo‘nalishi mumkin.

Ammo qayd etilishicha, soat 14:10 dan Jizzax viloyati Zomin tumani “Duoba” QFY tog‘liklarida qo‘shni Tojikiston bilan chegaradosh hududlarda chaqmoq-momaqaldiroqli jarayonlar rivojlangan, yong‘in hududida qisqa muddatli yomg‘ir yog‘ib o‘tgan. Yong‘in harakati tog‘ tomon harakatlanayotgan bo‘lsa, yomg‘irlarni o‘zi olovni o‘chirishi qo‘shimcha qilingan.