Марказий сайлов комиссиясининг тегишли қарорларига биноан Ўзбекистонда фаолият юритаётган бешта сиёсий партиянинг ваколатли вакиллари рўйхатга олинди. Бу ҳақда Марказий сайлов комиссияси матбуот хизмати маълум қилди.
Сайлов кампаниясида Марказий сайлов комиссияси ва сиёсий партия ўртасида мулоқот олиб бориш, талаб этилган ҳужжатларни тақдим қилишни ташкилий равишда тартибга солиш учун ваколатли вакил фаолияти йўлга қўйилади.
Ваколатли вакил, биринчи навбатда, сайловда иштирок этувчи сиёсий партиянинг манфаатини ифодалайди ва унинг сайлов жараёнидаги иштирокига оид масалаларни ҳал қилиб боради.
Марказий сайлов комиссияси томонидан гувоҳномалар топширилган сиёсий партиялар ваколатли вакиллари қуйидагилар:
- Якубов Бахтиёр Султонназирович – Тадбиркорлар ва ишбилармонлар ҳаракати – Ўзбекистон Либерал-демократик партияси;
- Маматхонов Баҳодиржон Мўллажон ўғли – Ўзбекистон «Миллий тикланиш» демократик партияси;
- Раҳмонов Абдукамол Шодиевич – Ўзбекистон «Адолат» социал-демократик партияси;
- Сангинов Саидрасул Саидакбарович – Ўзбекистон Экологик партияси;
- Вафоев Улуғбек Назарович – Ўзбекистон Халқ демократик партияси.
Бундан аввал Президент сайлови муносабати билан Ўзбекистонга келган ДИИҲБнинг илк миссияси хулосалари ҳақида маълумот берилгани, МСК вакили Ўзбекистон президентлигига номзодларни рўйхатга олиш тартиби юзасидан маълумот бергани ҳамда Президент сайлови муносабати билан Ўзбекистонга ДИИҲБнинг тўлақонли миссияси келиши маълум қилингани ҳақида хабар берилганди.
Изоҳ (0)