Тошкент маҳаллаларида истироҳат йўлаклари ташкил этилади

Тошкент шаҳар ҳокими Жаҳонгир Ортиқхўжаев 28 июль куни кўп қаватли уйлар ва аҳоли зич жойлашган маҳаллалар ҳамда унга туташ ҳудудларда пиёдалар йўлакларини ташкил қилиш тўғрисида қарорни имзолади. Бу ҳақда «Gazeta.uz» хабар қилди.

Қарор Президент ва бош вазирнинг кўрсатмаларига мувофиқ қабул қилингани қайд этилган. Қарорда 10 кун ичида истироҳат йўлаклари ва дам олиш ҳудудлари ташкил этиладиган маҳалла кўчаларининг манзил рўйхатини тузиш топширилди.

Ҳужжатда уларнинг жойлашуви аҳоли учун хавфсиз ва қулай бўлиши, қурилиш эса хусусий мулкка зарар бермасдан ва кўп йиллик дарахтларни кесмасдан амалга оширилиши таъкидланган.

Ҳокимнинг қарорида истироҳат йўлакларининг узунлиги 200–300 метргача бўлиши қайд этилган.

Истироҳат йўлакларни лойиҳалаштиришда қаттиқ қопламали майдон (асфальт, бетон ёки брусчатка қопламали), пиёдалар ва велосипедда сайр қилиш, болаларни фаол ўйинлар билан банд бўлиши, Workout ҳудудлар, ўриндиқлар ўрнатилишига эътибор қаратилади.

Айрим жойларда кўчма савдо дўконлари ва енгил конструкцияли (музқаймоқ, салқин ичимликлар, фастфуд, киоск ва ҳ.к.) хизмат кўрсатиш шохобчалари жойлаштирилади. Уларни ўрнатиш учун ер майдонларининг ижара ҳуқуқи E-ijro auksion савдо майдончасида электрон онлайн-аукцион орқали амалга оширилади.

Йўлаклар туман бошқарув бўлимлари томонидан буюртма қилинади, бош дизайнер ва бош пудратчи танлов орқали аниқланиши керак.

Лойиҳаларни муҳокама қилишда резидентлар иштирок этадими, йўқми ва улар қандай қилиб ўз таклифларини бериши мумкинлиги ҳақида маълумот берилмаган.

Эслатиб ўтамиз, ҳозирда Тошкентда маҳаллаларни ободонлаштириш ишлари дам олиш ҳудуди ва болалар майдончалари атрофида чегаралар ўрнатилиши, ички кўчаларни асфальтлаш ва инфратузилмани янгилаш билан давом этмоқда.

Апрель ойи охирида Шавкат Мирзиёев ободонлаштириш учун пойтахтдаги барча (520 дан ортиқ) маҳаллаларга ўртача 2 миллиард сўмдан ажратилишини эълон қилганди.

Бундан аввал Тошкентда боғлар, яшил ҳудудлар ва хиёбонлар сони кўпайтирилиши, Шавкат Мирзиёев Чирчиқ дарёси бўйидаги ободонлаштириш ва қурилиш жараёнини кўздан кечиргани ҳамда Ўзбекистонда дарахт экиб, парвариш қилмаган мутасадди ташкилотларни жаримага тортиш таклиф қилингани ҳақида хабар берилганди.