Президент Шавкат Мирзиёев 26 июль куни «Аҳолига кўрсатилаётган тиббий ёрдам сифатини янада яхшилаш чора-тадбирлари тўғрисида»ги қарорни имзолади.
Ҳужжат билан 2021—2022 йиллар давомида туман (шаҳар) тиббиёт бирлашмалари таркибида 35 та Туманлараро қўшма шикастланишлар ва ўткир қон томир касалликлари марказларини босқичма-босқич ташкил этишни назарда тутади.
Қуйидагилар марказларнинг асосий вазифалари этиб белгиланган:
- «Олтин соат» тамойили асосида қўшма шикастланишлар ҳамда ўткир қон томир касалликлари билан тиббий ёрдамга муҳтож беморларга шошилинч ва ихтисослаштирилган тиббий ёрдам кўрсатишни ташкил этиш;
- ўткир ва сурункали буйрак етишмовчилиги мавжуд беморларга гемодиализ хизматини кўрсатиш;
- марказларга бириктирилган туман (шаҳар)лар аҳолисига Соғлиқни сақлаш вазирлиги томонидан тасдиқланган тартибда тиббий хизмат кўрсатиш.
Шунингдек, қарор билан 2021—2023 йилларда болалар, туғиш ёшидаги, ҳомиладор ва бола эмизувчи аёлларни профилактик махсус препаратлар билан бепул таъминлаш чора-тадбирлари дастури тасдиқланган:
- 6-23 ойлик болалар учун уй шароитида тайёрланган овқатларни бойитиш мақсадида микронутриент кукуни билан;
- 6 ойликдан 5 ёшгача бўлган болаларни А витамин билан;
- 2-10 ёшдаги болаларни гелминтоз профилактикаси бўйича махсус препаратлар билан;
- Ҳомиладор ва бола эмизувчилар аёллар ҳамда 3-15 ёшдаги болаларни ёд препарати билан;
- 35 ёшгача туғиш ёшидаги аёлларни темир ва фолий кислотаси препарати билан.
Бундан ташқари, аҳолига кўрсатилаётган нефрология ва гемодиализ ёрдамини янада такомиллаштириш чора-тадбирлари режаси ҳам тасдиқланган:
- ҳудудларнинг умумий ўринлар фонди ҳисобидан нефрология ва гемодиализ бўлимларини 50 ўрингача етказиш;
- диализ аппаратлари ва сарфлаш воситаларини харид қилиш;
- 2021/2022-ўқув йилидан бошлаб олий тиббиёт таълим муассасаларида нефрология ва гемодиализ кафедралари фаолиятини йўлга қўйиш;
- Республика ихтисослаштирилган нефрология ва буйрак трансплантацияси илмий-амалий тиббиёт маркази биноларини қуриш ва реконструкция қилиш.
Изоҳ (0)