Ўзбекистон Президенти Шавкат Мирзиёев 24 июль куни Туркия президенти Ражаб Тоййиб Эрдўғон билан телефон орқали мулоқот қилди.
Туркия етакчиси Шавкат Мирзиёевни таваллуд куни билан самимий муборакбод этиб, унга мустаҳкам соғлиқ ва катта муваффақиятлар, Ўзбекистоннинг кўп миллатли халқига фаровонлик ва равнақ тилади.
Икки томонлама кун тартибининг долзарб масалалари юзасидан батафсил фикр алмашилди.
Кейинги йилларда Ўзбекистон–Туркия кўп қиррали ҳамкорлигининг жадал ривожланишига хизмат қилаётган ўзаро мулоқот ва алмашинувлар фаоллашгани мамнуният билан қайд этилди. Пандемия оқибатларига қарамай, 2021 йил бошидан товар айирбошлаш қарийб икки бараварга кўпайди, 230 дан ортиқ янги қўшма корхона ташкил этилди, муҳим маданий-гуманитар дастурлар амалга оширилмоқда.
Давлат раҳбарлари бўлажак тадбирлар режасини кўриб чиқди ҳамда 2021 йил якунига қадар Ўзбекистонда олий даражадаги Стратегик ҳамкорлик кенгашининг иккинчи йиғилишини ўтказишга пухта тайёргарлик кўриш муҳим эканини таъкидлади.
Минтақавий шерикликнинг амалий жиҳатлари, шу жумладан, Афғонистондаги вазиятнинг кескинлашиши нуқтаи назаридан муҳокама қилинди.
Марказий ва Жанубий Осиёда минтақавий боғлиқликни кучайтириш бўйича Тошкент халқаро конференциясининг якунлари юксак баҳоланди.
Бундан аввал Шавкат Мирзиёев ва Владимир Путин телефон орқали икки томонлама ва минтақавий ҳамкорлик масалаларини муҳокама қилгани, Шавкат Мирзиёев ва Гурбангули Бердимуҳамедов Марказий Осиё давлатлари раҳбарларининг саммитига тайёргарлик кўриш жараёнини муҳокама қилгани ҳамда экспертлар Президент Шавкат Мирзиёевнинг 15 та муҳим ислоҳотини санаб ўтгани ҳақида хабар берилганди.
Изоҳ (0)