O‘zbekiston Prezidenti Shavkat Mirziyoyev 24-iyul kuni Turkiya prezidenti Rajab Toyyib Erdo‘g‘on bilan telefon orqali muloqot qildi.
Turkiya yetakchisi Shavkat Mirziyoyevni tavallud kuni bilan samimiy muborakbod etib, unga mustahkam sog‘liq va katta muvaffaqiyatlar, O‘zbekistonning ko‘p millatli xalqiga farovonlik va ravnaq tiladi.
Ikki tomonlama kun tartibining dolzarb masalalari yuzasidan batafsil fikr almashildi.
Keyingi yillarda O‘zbekiston–Turkiya ko‘p qirrali hamkorligining jadal rivojlanishiga xizmat qilayotgan o‘zaro muloqot va almashinuvlar faollashgani mamnuniyat bilan qayd etildi. Pandemiya oqibatlariga qaramay, 2021-yil boshidan tovar ayirboshlash qariyb ikki baravarga ko‘paydi, 230 dan ortiq yangi qo‘shma korxona tashkil etildi, muhim madaniy-gumanitar dasturlar amalga oshirilmoqda.
Davlat rahbarlari bo‘lajak tadbirlar rejasini ko‘rib chiqdi hamda 2021-yil yakuniga qadar O‘zbekistonda oliy darajadagi Strategik hamkorlik kengashining ikkinchi yig‘ilishini o‘tkazishga puxta tayyorgarlik ko‘rish muhim ekanini ta’kidladi.
Mintaqaviy sheriklikning amaliy jihatlari, shu jumladan, Afg‘onistondagi vaziyatning keskinlashishi nuqtayi nazaridan muhokama qilindi.
Markaziy va Janubiy Osiyoda mintaqaviy bog‘liqlikni kuchaytirish bo‘yicha Toshkent xalqaro konferensiyasining yakunlari yuksak baholandi.
Bundan avval Shavkat Mirziyoyev va Vladimir Putin telefon orqali ikki tomonlama va mintaqaviy hamkorlik masalalarini muhokama qilgani, Shavkat Mirziyoyev va Gurbanguli Berdimuhamedov Markaziy Osiyo davlatlari rahbarlarining sammitiga tayyorgarlik ko‘rish jarayonini muhokama qilgani hamda ekspertlar Prezident Shavkat Mirziyoyevning 15 ta muhim islohotini sanab o‘tgani haqida xabar berilgandi.
Izoh (0)