Telegram messenjeri asoschisi Pavel Durov Pegasus josuslik dasturi orqali kuzatish uchun tanlangan potensial nishonlardan biri bo‘lgan. Bu haqda The Guardian xabar berdi.
Nashr Durovning Buyuk Britaniyada ro‘yxatdan o‘tgan va uning Telegram’dagi akkauntiga bog‘langan telefon raqami 2018-yildan beri Pegasus yordamida xakerlik hujumi uchun tanlangan raqamlar ro‘yxatida bo‘lganini aniqladi.
Durovning raqami ro‘yxatga Birlashgan Arab Amirliklari tomonidan 2018-yilda, u Finlyandiyadan Dubayga ko‘chib o‘tgan yili kiritilgan. Pegasus yordamida Durovning telefoniga haqiqatan ham buzib kirilganmi yoki yo‘q, buni telefonni tekshirmasdan turib aytish mumkin emas, deb ta’kidlaydi The Guardian.
Pegasus’ni ishlab chiqqan Isroilning NSO kompaniyasi bayonotiga ko‘ra, jurnalistlar tomonidan fosh etilgan ro‘yxatda kimningdir raqami borligi, o‘sha odam Pegasus yordamida kuzatilish uchun tanlanganini anglatmaydi.
Pavel Durov uning telefon raqami Pegasus nishonlarining ro‘yxatida bo‘lganini tasdiqladi. “Kamida 2018-yildan buyon mening telefon raqamlarimdan biri ushbu kuzatuv vositalari uchun potensial nishonlar ro‘yxatiga kiritilganini bilaman. Shaxsan meni bu bezovta qilmadi: 2011-yildan beri, men hali Rossiyada yashayotganimda, barcha telefonlarimga buzib kirilgan deb o‘ylar edim. Shaxsiy ma’lumotlarimga kirish huquqiga ega bo‘lgan har qanday kishining hafsalasi pir bo‘ladi: u Telegram funksiyalarining minglab versiyalari va rivojlanish jarayoni bilan bog‘liq millionlab xabarlarga duch keladi. Xakerlar u yerdan muhim ma’lumotlarni topa olmaydi”, — dedi Durov.
Ushbu haftada jurnalistlar turli mamlakatlar hukumati Pegasus’dan siyosatchilar, huquq himoyachilari va jurnalistlarni ommaviy kuzatish uchun foydalanganini aniqladi.
The Washington Post xabariga ko‘ra, Pegasus orqali kuzatish nishonlari orasida 14 ta davlat rahbari bo‘lgan. Ular orasida Fransiya prezidenti Emmanuel Makron ham bor.
Le Monde nashrining xabarga ko‘ra, 2017-yildan beri Makronning raqami Pegasus dasturi yordamida potensial xakerlik uchun Marokash razvedka xizmati tomonidan tanlangan telefon raqamlari ro‘yxatida bo‘lib kelgan. Shuningdek, ehtimoliy nishonlar ro‘yxatiga Fransiyaning sobiq bosh vaziri Eduard Filipp va yana 14 vazirning raqamlari kiritilgan.
Emmanuel Makron ushbu ish bo‘yicha bir qator tekshiruvlar o‘tkazishni buyurdi. Fransiya prezidentining rasmiy qarorgohi bo‘lgan Yelisey saroyi agar jurnalistlar keltirgan faktlar rost bo‘lsa, demak vaziyat jiddiy ekanini ta’kidlagandi.
Marokash hukumati esa Makron va vazirlarning smartfoni Marokash razvedka xizmatlari tomonidan kuzatilgan bo‘lishi mumkinligi haqidagi xabarlarni rad etdi.
“Marokash Qirolligi yolg‘onga asoslangan keng ko‘lamli va davomli zarar keltiruvchi ommaviy axborot kampaniyasini qat’iyan qoralaydi, asossiz taxminlarni rad etadi va ularni tarqatuvchilarni ushbu ertaklarning sezilarli va moddiy dalillarini keltirishga chaqiradi”, — deyiladi qirollik bayonotida.
Rasmiylarning ta’kidlashicha, bunday tuhmatni tarqatuvchilar javobgarlikka tortilishi mumkin.
Ma’lumot uchun, Pegasus — bu zararli dastur bo‘lib, u iOS yoki Android qurilmalariga kirib boradi va foydalanuvchiga bildirmasdan xabarlar, fotosuratlar, joylashuv ma’lumotlariga kirish, kamera va mikrofonni faollashtirishga imkon beradi.
Izoh (0)