Афғонистон муаммосининг ҳарбий ечими йўқ, мамлакатдаги вазиятдан чиқишнинг тинч йўлини топиш керак. Тожикистон президенти Эмомали Раҳмон шундай фикрда, деб ёзади «Интерфакс».
«Қўшни давлат Афғонистон Ислом Республикасида, айниқса унинг мамлакатимиз билан чегарадош шимолий вилоятларида вазият ўта оғир ва ноаниқ бўлиб қолмоқда, уларнинг аҳволи кун сайин, ҳатто соат сайин ёмонлашмоқда», — деди Эмомали Раҳмон мамлакат ҳарбий ва хавфсизлик кучлари шахсий таркибига қилган мурожаатида.
«Бу мамлакатнинг сиёсатчилари, барча сиёсий партиялар ва ҳаракатлар раҳбарлари, зиёлилар, таниқли шахслар ва бутун халқи бирлашиб, ўз ватани, давлати ва миллатини беқарорлик ҳамда таназзулдан қутқарадиган вақт келди», — деди Тожикистон раҳбари.
Унинг сўзларига кўра, бундай фожиали воқеалар учун афғонистонликлар айбдор эмас.
«Ушбу бузғунчи жараёнлар қўшни давлатимизнинг ички ишларига чет элликларнинг аралашуви натижасидир, бу ҳолат 40 йилдан бери давом этмоқда», — деди Тожикистон президенти.
Эмомали Раҳмон ўз мамлакати аҳолиси ҳам бундай фожиани бошдан кечирганини, «яъни 90 йилларнинг бошларида чет эл аралашуви фуқаролар урушига олиб келгани ва унинг даҳшатли оқибатлари ҳанузгача сезилаётганини» эслаб ўтди.
«Уруш натижасида 150 мингдан ортиқ фуқароларимиз ҳалок бўлган, 50 минг бола етим қолган. Бундай аччиқ тарихий тажрибани ҳисобга олган ҳолда биз ҳеч қачон қўшниларимизнинг ички ишларига аралашмаймиз. Шунингдек, ўз қуролли кучларимизни ҳеч қачон қўшни давлатларга қарши ишлатмаслигимизни қатъий маълум қиламиз», — дея таъкидлади Тожикистон раҳбари.
«Биз ҳамиша қўшни давлатларда тинчлик ва барқарорлик бўлишини қўллаб-қувватлаймиз ва улар билан тинчлик, барқарорлик, дўстлик ва ҳамкорлик муҳитида яшаймиз», — деди у.
Тожикистонда 22 июлга ўтар кечаси ҳарбий шайликни текшириш бўйича «Чегара—2021» машғулотлари бошланди. Уларда мамлакат Қуролли Кучлари ва куч тузилмаларининг барча бўлинмалари иштирок этмоқда, 230 мингдан ортиқ одам жалб қилинган. Машғулотлар Тошкент вақти билан соат 04:00 да президент Эмомали Раҳмоннинг фармойиши билан старт олган.
30 июль куни Россия ва Ўзбекистон Сурхондарё вилоятида ўқув машғулотларини бошлайди. Уларда қарийб 1,5 минг ҳарбий қатнашиши кутилмоқда. 5 август куни эса Тожикистоннинг Хатлон вилоятида Россия, Ўзбекистон ва Тожикистоннинг қўшма машғулотлари бошланади.
Машғулотлар Афғонистондаги вазиятнинг кескинлашуви фонида ўтказилмоқда.
Афғонистон ҳукумати кучлари ва «Толибон» ўртасидаги тўқнашувлар АҚШ ўз қўшинларини Афғонистондан олиб чиқишни бошлагач кучайди.
Афғонистондан НАТО қўшинларини олиб чиқиш 29 апрелда бошланган, АҚШ ва «Толибон» ўртасида тузилган келишувга биноан жараён кузда якунланиши керак. Сўнгги маълумотларга кўра, АҚШ Афғонистондаги ҳарбий контингентининг 90 фоиздан кўпроғини олиб чиқиб кетди.
Германия, Италия ва Австралия эса Афғонистондан ўз қўшинларини олиб чиқишни якунлади.
Изоҳ (0)