Ўзбекистон, Тожикистон ва Россия ҳарбийлари афғон-тожик чегарасида амалий машғулот ўтказади

1–10 август кунлари Хатлон йўналишида Тожикистоннинг Афғонистон билан чегараларида Тожикистон, Ўзбекистон ва Россия Қуролли Кучларининг кенг кўламли қўшма ҳарбий машғулотлари бўлиб ўтади. Бу ҳақда Asia-Plus нашри хабар берди.

Маълум қилинишича, Афғонистон билан чегарада жойлашган «Харбмайдон» ҳарбий полигонида Тожикистон, Ўзбекистон ва Россия ҳарбийларининг терроризмга қарши қўшма машғулотлари бўлиб ўтади.

Машғулотларда уч давлатнинг ҳаво кучлари, ҳаво ҳужумидан мудофаа кучлари, зирҳли техника ва махсус қўшинлари иштирок этади. Машғулотнинг мавзуси Афғонистондан Тожикистонга террорчилар кириб келган тақдирда, чегарадаги уч давлат ҳарбийлари ҳаракатларини мувофиқлаштириш бўлади.

Манбанинг таъкидлашича, режалаштирилган манёврлар «Тожикистон, Ўзбекистон ва Россия ҳарбийларининг биринчи тўлиқ қўшма машғулотлари» ҳисобланади.

Аввалроқ Россия Афғонистондаги вазият туфайли Тожикистондаги ҳарбий базасидан фойдаланишга тайёрлигини билдирганди.

Эслатиб ўтамиз, июнь охирларида Ўзбекистон Мудофаа вазирлиги ҳарбий округларида қўшинларни жанговар шайликка келтириш бўйича амалий машғулотлар ўтказганди. Мудофаа вазири Баҳодир Қурбонов раҳбарлигида Жануби-ғарбий махсус ҳарбий округи ҳамда Ҳаво ҳужумидан мудофаа қўшинлари ва Ҳарбий ҳаво кучлари ҳарбий қисм ва бўлинмаларида текширувлар бўлиб ўтган.