Тошкент вилояти ва шаҳрида Ўзбекистон давлат жисмоний тарбия ва спорт университетига ўқишга киритиб қўйишни ваъда қилган шахслар ушланди, деб хабар беради Бош прокуратура ҳузуридаги департамент.
Маълум қилинишича, Бош прокуратура ҳузуридаги департаментнинг Чиноз тумани бўлими томонидан тезкор тадбир ўтказилган. Тадбирда Ўзбекистон Давлат жисмоний тарбия ва спорт университети ўрганувчи-ўқитувчиси И.Б. фуқаро Р.ни 7 минг доллар эвазига юқори лавозимида ишловчи танишлари орқали ушбу университетга ўқишга киритиб қўйишга ваъда бергани аниқланган. Бунинг эвазига у олдиндан 3,5 минг долларни олган вақтда ашёвий далиллар билан қўлга олинган.
Шунингдек, департамент ҳамда ДХХнинг Учтепа тумани бўлимлари томонидан ўтказилган тезкор тадбирда Тошкент давлат аграр университети спорт клуби мураббийи С.А. ва бошқалар олдиндан тил бириктириб, фуқаро Ш.ни Ўзбекистон давлат жисмоний тарбия ва спорт университетига юқори лавозимларда ишловчи танишлари орқали ўқишга киритиб қўйишни ваъда қилгани маълум бўлган. Хизмати эвазига улар 4,2 минг долларни олган вақтда ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Аввалроқ Сурхондарёда талабанинг ўқишини Қозоғистондан Ўзбекистонга кўчириб бериш учун 15,6 млн сўм ва 300 доллар сўраган шахс ушлангани, Фарғонада талабанинг ўқишини хориж университетидан Ўзбекистонга кўчириб бериш эвазига 8 минг доллар олган ўқитувчи қўлга олингани, Тошкентда фуқаронинг хориждаги ўқишини ТошМИга кўчириб бериш эвазига 6 минг доллар олган шахс ушлангани ҳамда Бухорода ўқишга киритиб қўйиш учун икки фуқародан 4 минг доллар олган шахслар ушлангани ҳақида хабар берилганди.
Изоҳ (0)