Қашқадарё вилояти Косон туманида хотинини унинг ишхонасида пичоқлаб ўлдирган 60 ёшли эркакка нисбатан жиноят иши қўзғатилди. Бу ҳақда вилоят ИИБ ахборот хизмати хабар берди.
Маълум қилинишича, 10 июль куни соат 09:00 ларда эркак турмуш ўтроғи ишлайдиган шифохонага эмланиш баҳонасида келган. Ҳамширалар эркакнинг шахсий касаллик картасини қидираётган вақтда у бино ичига кириб кетган.
Ичкарига кирган эр тўғри аёли ишлаб ўтирган хонага борган. Аёл эридан қочиб, дуч келган хонага кириб кетган, бироқ эркак унинг ортидан бориб, ёнида бўлган пичоқ билан унга тан жароҳатлари етказган.
«Доим ичиб келиб, жанжал қилади. Яшолмайман у билан, деб айтарди. Хонага кирсам, эри устида пичоқлаб ётган, бош шифокоримиз ажратиб олаётган экан», — дейди марҳуманинг ҳамкасбларидан бири.
Маълум бўлишича, эркак бунга қадар уч марта уйланган ва марҳума унинг шаръий никоҳдаги тўртинчи хотини бўлган.
Ҳозирда ҳолат юзасидан жиноят иши очилиб, тергов ҳаракатлари олиб борилмоқда.
Аввалроқ Андижонда 25 ёшли аёл норасмий эрини бўғиб ўлдириб, жасадни ҳожатхона чуқурига ташлаб юборгани, Тошкентда аёл маст ҳолда шаръий никоҳдаги турмуш ўртоғини пичоқлаб ўлдиргани тўғрисида хабар берилганди.
Изоҳ (0)