1–10-avgust kunlari Xatlon yo‘nalishida Tojikistonning Afg‘oniston bilan chegaralarida Tojikiston, O‘zbekiston va Rossiya Qurolli Kuchlarining keng ko‘lamli qo‘shma harbiy mashg‘ulotlari bo‘lib o‘tadi. Bu haqda Asia-Plus nashri xabar berdi.
Ma’lum qilinishicha, Afg‘oniston bilan chegarada joylashgan “Xarbmaydon” harbiy poligonida Tojikiston, O‘zbekiston va Rossiya harbiylarining terrorizmga qarshi qo‘shma mashg‘ulotlari bo‘lib o‘tadi.
Mashg‘ulotlarda uch davlatning havo kuchlari, havo hujumidan mudofaa kuchlari, zirhli texnika va maxsus qo‘shinlari ishtirok etadi. Mashg‘ulotning mavzusi Afg‘onistondan Tojikistonga terrorchilar kirib kelgan taqdirda, chegaradagi uch davlat harbiylari harakatlarini muvofiqlashtirish bo‘ladi.
Manbaning ta’kidlashicha, rejalashtirilgan manyovrlar “Tojikiston, O‘zbekiston va Rossiya harbiylarining birinchi to‘liq qo‘shma mashg‘ulotlari” hisoblanadi.
Avvalroq Rossiya Afg‘onistondagi vaziyat tufayli Tojikistondagi harbiy bazasidan foydalanishga tayyorligini bildirgandi.
Mavzuga doir:
Izoh (0)