Жонс Ҳопкинс университети маълумотларига кўра, дунёда коронавирусга чалинганлар сони 190 467 683 кишига етди, шуларнинг 4 089 900 нафари вафот этди. Касалланиш ҳолатларининг кўплиги бўйича АҚШ (34 миллион), Ҳиндистон (31,1 миллион), Бразилия (19,3 миллион), Франция (5,9 миллион) ва Россия (5,9 миллион) энг олдинда бормоқда.

Париж метросига мусиқачилар қайтди, улар коронавирус пандемияси туфайли бир йилдан ортиқ вақт метрода куйлай олмаганди

Фото: Getty Images

Исроил бош вазири Нафтали Беннет коронавирус билан касалланиб, ўз-ўзини яккалаш режимини атайлаб бузган шахсларни жиноий жавобгарликка тортиш тўғрисида қарор чиқарди.

«Коронавирус аниқланган ва ўз-ўзини яккалаш шартларини қасддан бузиб, шу тариқа жамоатчилик саломатлигини хавф остига қўйган» фуқаролар жиноий жавобгарликка тортилади ва суд таъқибига учрайди.

Беннет қайд этишича, коронавируснинг бутун дунё бўйлаб тезкорлик билан тарқалаётган дельта штаммига қарши курашиш учун чораларни кучайтириш зарур.

2021 йилнинг баҳорида Исроил коронавирусга қарши вакцинация шиддати бўйича энг илғор мамлакатлардан бири бўлган эди. Айни пайтда, The New York Times ҳисоб-китобларига кўра, мамлакат аҳолисининг 58 фоиздан ортиғи тўлиқ эмланган, 63 фоизга яқини камида битта дозани олган.

Тезкор вакцинация кампанияси шарофати билан, ҳукумат ёз бошида деярли барча чекловларни, ҳатто ниқоб режимини ҳам бекор қилган эди. Аммо июнь охирида касалланиш даражаси яна орта бошлади.

Жанубий Кореянинг Яқин Шарқда қароқчиларга қарши кураш учун патруллик қилаётган ҳарбий кемасининг бутун экипажи бортда коронавирус авж олгани туфайли алмаштирилади.

Штаб бошлиқлари бирлашган қўмитасида маълум қилишларича, Жанубий Кореянинг «Чхонхе» бўлинмасидаги 301 денгизчининг 247 нафарида коронавирус тест билан тасдиқланган.

Кемага янги экипажни етказиш учун Яқин Шарқдаги аэропортлардан бирига иккита транспорт самолёти учиб кетган. Ўз навбатида касалланган экипаж ўша рейс билан Жанубий Корея госпиталларидан бирига эвакуация қилинади.

Мамлакат Мудофаа вазирлиги маълумотларига кўра, ҳозирги пайтгача чет эл миссияларида бўлиб турган қарийб 1300 нафар ҳарбий хизматчининг тахминан 73 фоизи, шу жумладан, «Чхонхе» бўлинмаси янги партиясининг барча аъзолари тўлиқ эмланган.

Европа Иттифоқи биринчи марта коронавирусга қарши вакцинанинг камида битта дозасини олган одамлар улуши бўйича АҚШни ортда қолдирди.

Евроиттифоқ мамлакатларида ҳеч бўлмаганда битта дозада эмланганлар жами аҳолининг 55,6 фоизини ташкил қилади, АҚШда эса ушбу кўрсаткич ҳозирча 55,4 фоизга тенг.

Айни вақтда АҚШ тўлиқ эмланган фуқаролар сони бўйича дунёда етакчи бўлиб қолмоқда: у ерда аҳолининг 48 фоизи, Евроиттифоқ мамлакатларида эса 42 фоизи тўлиқ вакцина олган.

«Европа сайёрамизда коронавирусга қарши киритилган биринчи дозалар энг кўп бўлган қитъа сифатида биринчи ўринга чиқиб олди. Ўтган шанба куни (17 июль) биз АҚШдан ўзиб кетдик», — деди ички бозор бўйича Еврокомиссар Тьерри Бретон.

Англияда касалланиш даражасидаги ўсишга қарамай, коронавирус билан боғлиқ ички чекловларнинг барчаси бугун, 19 июлдан бекор қилинди.

Мамлакатда тунги клублар ишлай бошлади, бошқа муассасалардан ҳам чекловлар олиб ташланди. Шунингдек, ниқоб тақиш, ижтимоий масофаланиш ва уйдан ишлаш мажбуриятлари бекор қилинди.

Буюк Британия бош вазири Борис Жонсон аҳолига видеомурожаат йўллаб, ҳозир чекловларни олиб ташлашнинг айни мавриди экани, чунки бу жараён куз ёки қишга қолдирилса, «вирус совуқ ҳаво туфайли устунликка эга бўлиши»ни айтди. Жонсон, шунингдек, барча аҳолини COVID-19’га қарши эмланишга чақирди.