Koreya Respublikasi prezidenti Mun Chje In 11-yanvar, dushanba kuni mamlakatning barcha fuqarolari koronavirusga qarshi bepul emlanishini e’lon qildi, deb xabar bermoqda “Interfaks”. Bu jarayon kelasi oydan boshlanishi kerak.

Foto: “Trend.az”

O‘zining yangi yil murojaatida prezident 2021-yil koronavirus tufayli yuzaga kelgan inqirozdan keyin “qayta tiklanish”, ijtimoiy tengsizlikni kamaytirish uchun “inklyuzivlik” va Janubiy Koreyani yetakchi mamlakatga aylantirish tomonga qo‘yilgan olg‘a qadam bo‘lishini aytgandi.

11-yanvar, dushanba kuni holatiga ko‘ra Janubiy Koreyada so‘nggi bir kecha-kunduzda 451 kishi COVID-19’ga chalingan. Bu yakshanba (665), shanba (641) va juma (674) kunlariga nisbatan kamroq (bu dam olish kunlari testlar kamroq topshirilgani bilan bog‘liq bo‘lishi ham mumkin). Jami kasallanish holatlari 69,1 mingga, koronavirusga bog‘liq sabablardan vafot etganlar 1140 kishiga yetdi.

COVID-19’ni yuqtirib olish bilan bog‘liq 1000 dan ortiq holat qayd etilgan 3-yanvardan buyon pasayish kuzatilmoqda. Bunga 17-yanvargacha joriy qilingan ijtimoiy masofalanish bo‘yicha choralar imkoniyat yaratdi.

The Korea Times yozishicha, 2021-yil Janubiy Koreyada grippga chalinish darajasi o‘tgan mavsumga nisbatan ancha past.

Mamlakatda 11 million kishi grippga qarshi bepul emlandi. Ammo bunda koronavirusga qarshi himoya choralari — niqob taqish, masofalanish va shaxsiy gigiyenaning kuchaytirilishi katta rol o‘ynagan bo‘lishi mumkin, deya qayd etdi ekspertlar.

Seul Pfizer va Janssen kompaniyalari bilan koronavirusga qarshi vaksinalar yetkazib berish haqida bitim tuzganini Janubiy Koreya bosh vaziri Chon Syo Gyun 2020-yil dekabrida ma’lum qilgan edi. Pfizer 10 million, Janssen 6 million kishini emlashga yetadigan vaksina yetkazadi. Keyinroq Janubiy Koreya prezidentining ofisi xabar qilishicha, Moderna kompaniyasi mamlakatga 20 million kishi uchun vaksina dozalarini yetkazib beradi.