Афғонистоннинг Покистондаги элчиси ва юқори мартабали дипломатлари Кобулга чақирилди. Бу ҳақда Афғонистон Ташқи ишлар вазирлигига таяниб, «Интерфакс» хабар берди.
«Покистондаги Афғонистон элчисининг қизи ўғирлаб кетилгандан сўнг Ислом Республикаси раҳбарияти элчини ва юқори мартабали дипломатларни Кобулга чақирди», — дейилади Афғонистон ТИВ баёнотида.
Таъкидланишича, яқин келажакда Афғонистон делегацияси «ўғирлаш иши ва унга тегишли масалалар бўйича текширув ўтказиш ва чоралар кўриш учун Покистонга ташриф буюришни режалаштирмоқда. Якуний қарор делегациянинг хулосалари асосида қабул қилинади».
Покистон Ташқи ишлар вазирлиги Афғонистоннинг ўз элчисини қайтариш тўғрисидаги қароридан афсусда ва унинг қайта кўриб чиқилишига умид қилмоқда.
«Покистон ТИВ Афғонистон ҳукуматининг Покистондан ўз элчиси ва юқори мартабали дипломатларини олиб кетиш тўғрисидаги қарори ачинарли ва қайғули эканини билдирди», — деб ёзади Покистоннинг Афғонистондаги элчиси Мансур Аҳмад Хон Twitter’да.
Унинг таъкидлашича, «Исломободда элчининг қизи ўғирлангани ва қийноққа солингани тўғрисидаги хабарлар текширилмоқда ва бош вазир кўрсатмаси билан юқори даражада кузатилмоқда».
Мансур Аҳмад Хоннинг қўшимча қилишича, «элчи, унинг оиласи ҳамда Афғонистоннинг Покистондаги элчихонаси ва консулхоналари ходимларининг хавфсизлиги янада кучайтирилди».
«Ташқи ишлар вазири Афғонистон элчиси билан учрашди, ҳукуматнинг ушбу вазиятда кўрган барча қадамларини таъкидлаб ўтди ва уни тўлақонли ҳамкорликка қайта ишонтирди. Афғонистон ҳукумати қарорини қайта кўриб чиқади деб умид қиламиз», — деди Покистоннинг Афғонистондаги элчиси.
Ўз навбатида, «Толибон» Исломободдаги Афғонистон элчисининг қизи ўғирлаб кетилганини қоралади ва Покистон расмийларидан ўғриларни топиб жазолашни талаб қилди.
«Ўғирлаш — бу биз қоралайдиган тажовуз. Бундай ҳаракатлар икки мамлакат ўртасида нафрат пайдо қилмаслиги учун биз Покистон ҳукуматини жиноятчиларни ҳибсга олиш ва жазолаш бўйича ҳаракатларни кучайтиришга чақирамиз,» — деб ёзади «Толибон» матбуот хизмати котиби Суҳайл Шоҳин Twitter’да.
Эслатиб ўтамиз, номаълум шахслар Покистондаги Афғонистон элчисининг қизини ўғирлаб кетиб, қийноққа солган.
26 ёшли Силсила Алихаил 17 июль, жума куни велосипедда уйига қайтаётган вақтида ўғирлаб кетилган ва беш соатга яқин «шафқатсизларча қийноқларга солинган», дея маълум қилди Афғонистон Ташқи ишлар вазирлиги.
Тиббий ҳисоботда айтилишича, қизнинг танасида тимдаланган жойлар, билаклари ва тўпиқларида арқон излари бор, шунингдек, бошининг энса қисмида гематома аниқланган. Асирликдан озод этилгач, қиз касалхонага ётқизилган.
Аввалроқ Покистон бош вазири Имрон Хон Афғонистондаги вазият Ўзбекистон ва Покистон учун жудаям ташвишли эканини қайд этган эди.
Мавзуга доир:
Изоҳ (0)