Бразилия шимолидаги Пара штатида янги қурилаётган электр узатиш линиясининг устуни қулаб тушиши оқибатда камида етти киши ҳалок бўлган, беш киши жароҳатланган. Бу ҳақда ҳудуд ҳукуматига таяниб, G1 портали хабар берди.
Фожиа 16 июль куни содир бўлган. Олти нафар ишчи фавқулодда вазият чоғида, яна бир киши эса касалхонада вафот этган.
Таъкидланишича, воқеа содир бўлган пайтда ҳаммаси бўлиб, камида 26 киши ишлаётган эди. Қутқарувчилар қидирув-қутқарув ишларини олиб бормоқда.
12 июль куни Хитойнинг Сучжоу шаҳридаги «Кайюань» меҳмонхона биноси қулаб тушган эди. Ҳодиса оқибатида 17 киши ҳалок бўлган. Қидирув-қутқарув ва вайроналарни демонтаж қилиш ишларига 600 дан ортиқ одам, кранлар ва бошқа техникалар жалб қилинган. Натижада бино вайроналари остидан асосан меҳмонхона меҳмонларидан иборат бўлган 23 киши олиб чиқилган, улардан беш нафари турли даражадаги жароҳатлар билан касалхонага ётқизилган.
13 июль куни эрталаб Россиянинг Геленжик шаҳридаги меҳмонхонада газ портлаб, оқибатида икки киши ҳалок бўлган, яна беш киши жароҳат олганди. Меҳмонхонадан 50 киши эвакуация қилинган.
Аввалроқ Флоридада 12 қаватли турар жой қулаб тушиб, 99 киши бедарак йўқолгани, сўнг бинонинг омон қолган қисми ҳам портлатиб бузилгани, бино вайроналари остидан омон қолганларни қидириш тўхтатилгани ҳақида хабарлар берилганди.
Изоҳ (0)