Евроиттифоқ иқлим ўзгаришига қарши кураш учун йирик режа ишлаб чиқди. 14 йилдан кейин Европада бензинда юрадиган автомобиллар сотилмайди

Еврокомиссия 14 июль куни иқлим ўзгаришига қарши кураш режасининг концепциясини эълон қилди. Унда 2030 йилга келиб Европада зарарли иссиқхона газларини 1990 йилга нисбатан 55 фоизгача камайтириш назарда тутилган (ҳозир Европада уларнинг миқдори 76 фоизни ташкил қилади).

Режанинг асосий бандлари:

• Импорт қилинадиган товарларга уларнинг углерод кўрсаткичига қараб божхона божини жорий этиш. Биринчи босқичда бу электр энергияси, ўғитлар, пўлат, алюминий, цементга тегишли бўлади.
• Кейинги 15 йил ичида янги автомобиллар учун эмиссия (зарарли газ ажратиш) стандартларини босқичма-босқич қатъийлаштириш. 2035 йилдан бошлаб уларнинг углерод ажратиши нолга тенг бўлиши керак — бу Европа Иттифоқида ички ёниш двигателлари бензин ва дизель ёқилғисида ишлайдиган автомобилларни сотиш тақиқланишини англатади.
• Электр ва водород ёқилғисида ҳаракатланадиган транспорт воситаларини зарядловчи станциялар тармоғини сезиларли даражада кенгайтириш.
• Авиация ва денгиз орқали юк ташиш оқибатида атроф-муҳитнинг ифлосланишига солиқ солиш.
• Иқтисодиётнинг янги тармоқларини киритиш орқали карбонат ангидрид зарарли газлари савдоси тизимини кенгайтириш.

Режа кучга кириши учун уни Европа парламенти ва Европа Иттифоқига аъзо давлатларнинг барчаси тасдиқлаши керак. Режани ишлаб чиқувчилар уни якуний қабул қилиш учун, тахминан, икки йил керак бўлади деб умид қилмоқда.

Таҳлилчиларнинг фикрига кўра, режа Европа Иттифоқидаги даромади нисбатан кам мамлакатларнинг қаршилигига сабаб бўлиши мумкин, чунки экологик тоза ёқилғига ўтиш маҳсулот ва хизматларнинг нархини оширади.

Бундан ташқари, Европада деярли бутунлай кўмир билан ишлайдиган электр станциялари томонидан ишлаб чиқарилган электр энергиясига тобе йирик минтақалар мавжуд ва улар иқтисодиётни деярли тўлиқ ислоҳ қилиш учун қўшимча молиявий кафолатларни талаб қилади. Ушбу кафолатлар учун дастлабки режа доирасида Европа Иттифоқи бюджетидан 72 миллиард евро тақдим этилади.

Ўз навбатида, табиатни муҳофаза қилиш ташкилотларининг айрим вакиллари режада таклиф қилинган чоралар етарли эмас деб ҳисобламоқда. Уларнинг фикрича, ушбу чоралар глобал исишни тўхтатмайди.