АҚШнинг Шимолий Каролина штати суди «Воeнторг» (ҳарбий хизматчилар ҳамда уларнинг оилаларини савдо ва маиший қўллаб-қувватлаш тизими) раҳбарининг собиқ ўринбосари Леонид Тейфни беш йилга озодликдан маҳрум қилди. Бу ҳақда Meduza хабар берди.
Хабарга кўра, қамоқдан чиққандан кейин Тейф яна уч йил полиция назорати остида бўлади.
АҚШда 2010 йилдан бери яшаб келаётган Тейф 2018 йилда ҳибсга олинган. Тергов маълумотларидаги версияга кўра, у «пул ювиш» учун тил бириктиришда айбланган. Тейф 2010 йилдан 2012 йилгача «Воeнторг» директорининг ўринбосари сифатида ишлаб, ташкилот билан шартномалар тузган субпудратчилардан ноқонуний равишда ҳақ олган. Шу тарзда у 150 миллион доллардан кўпроқ маблағни қўлга киритиб, кейинчалик уларни Америка банклари орқали «ювган».
Агар Тейф ушбу версия бўйича айбдор деб топилганда, у 20 йилгача озодликдан маҳрум қилиниши мумкин эди, аммо 2021 йил март ойида Тейф тергов билан келишув тузди. Шундан сўнг прокуратура унга беш йил берилишини талаб қилиб, 50 бандли айбловнинг 47 тасини бекор қилди. Тейфнинг ўзи порахўрлик, визага оид фирибгарлик ва чет эл активлари тўғрисида ёлғон маълумотлар берганлик бўйича айбини тан олди.
Аввалроқ Беларусь Олий суди Виктор Бабарикони 14 йилга озодликдан маҳрум қилгани ҳақида хабар берилганди, жазо қаттиқ тартибдаги колонияда ўталади. Беларуснинг энг таниқли банкирларидан бири бўлган Бабарико 2020 йилда президентлик учун номзодини қўйганди.
Изоҳ (0)