Гаити ҳукумати мамлакатдаги асосий инфратузилма — портлар, аэропортлар, ёқилғи захираларини ҳимоя қилиш учун АҚШдан ўз қўшинларини юборишни сўради. Бу ҳақда Гаитининг сайловлар вазири Матиас Перга асосланиб, The New York Times газетаси хабар берди.
Вазирнинг сўзларига кўра, ушбу сўров АҚШ президенти Жо Байден ва давлат котиби Энтони Блинкеннинг Гаити президенти Жовенел Моиз ўлдирилгандан сўнг республикадаги вазиятни барқарорлаштиришга ёрдам бериш ҳақидаги ваъдаларидан кейин юборилган.
Матиас Пернинг Reuters агентлигига айтишича, ҳарбий ёрдам сўрови республика бош вазири Клод Жозеф томонидан АҚШ давлат котиби Энтони Блинкен билан муҳокама қилинган. Бундан ташқари, мамлакат Бирлашган Миллатлар Ташкилотидан ёрдам сўраб мурожаат қилган.
Гаити ҳукумати президент ўлдирилганидан кейинги нотинчлик мамлакатда шундоқ ҳам қийин бўлган вазиятни янада кучайтириши мумкинлигидан хавотирда.
«Биз ўзимизни шундай ҳолатга туширдикки, мамлакат инфратузилмаси — портлар, аэропортлар ва энергетика иншоотлари ҳужумларнинг нишонига айланиши мумкин», — деди Пер. Пентагон Гаитидан «хавфсизлик ва тергов ўтказиш бўйича ёрдам» сўрови олганини тасдиқлади. CNN маълумотларига кўра, гап 500 га яқин қўшин ҳақида бораётган бўлиши мумкин.
Кейинроқ Reuters АҚШ президенти маъмуриятининг юқори лавозимли вакилига асосланиб ёзишича, Гаитидаги сиёсий инқироз шароитида АҚШ мамлакатга ҳозирча ҳарбий ёрдам кўрсатмоқчи эмас.
Эслатиб ўтамиз, Гаити президенти Жовенел Моиз 7 июлга ўтар кечаси отиб ўлдирилди. Порт-о-Пренсдаги президент қароргоҳига қуролли шахслар ҳужум қилган. Ҳужумда президентнинг рафиқаси Мартин Моиз ҳам ўқ еб яраланган. Шундан сўнг Гаити ҳукумати мамлакатда ҳарбий ҳолат эълон қилди.
Гаити полицияси бошлиғи Леон Шарлнинг маълум қилишича, президентни ўлдирган қуролли отряд таркибида камида 26 нафар Колумбия фуқароси ва келиб чиқиши гаитилик икки нафар АҚШ фуқароси бўлган. 15 нафар колумбиялик ва икки америкалик ҳибсга олинган. Уч киши полиция томонидан ўлдирилган, яна саккиз киши қочиб кетган.
Колумбия мудофаа вазири Гаити президентини ўлдиришда гумонланувчиларнинг камида олти нафари истеъфодаги ҳарбий хизматчилар бўлганини айтиб, тергов ишларида ёрдам беришни ваъда қилди.
Ҳибсга олинган америкаликлар давлат раҳбарини ўлдиришни мўлжалламаганини, уни «суд буйруғи билан» ҳибсга олиш ниятида бўлганини айтди. Сўроқ пайтида, шунингдек, улар суиқасд уюштиришда инглиз ва испан тилларини биладиган Майк исмли чет эл фуқароси айбдор эканини билдирди. Таъкидланишича, ҳужум режаси тахминан бир неча ой давомида тузилган, гуруҳ аъзолари Гаити пойтахтининг чеккасидаги обрўли меҳмонхонада учрашган.
Гаити бош вазири вазифасини бажарувчи Клод Жозеф янги сайловлар ўтказилгунга қадар мамлакат раҳбари бўлиб қолади.
Изоҳ (0)